حال ہی میں انٹرنیشنل کرکٹ سے ریٹائرمنٹ کا اعلان کرنے والے کامیاب ترین بھارتی اسپن بولر روی چندرن اشوِن کے حوالے سے انکشاف سامنے آیا ہے کہ ایک مرتبہ انہوں نے آئی پی ایل فرنچائز کی ٹیم دہلی کیپیٹل کے ساتھی کھلاڑی اور آسٹریلین بیٹر اسٹیو اسمتھ کو نیٹ پریکٹس کے دوران بولنگ کرانے سے انکار کر دیا تھا۔ یہ انکشاف سابق بھارتی کرکٹر اور دہلی کیپیٹل ٹیم سے وابستہ محمد کیف نے کیا ہے ۔ بھارتی میڈیا کے مطابق کیف نے بتایا کہ ایک مرتبہ اشوِن پریکٹس کے دوران آسٹریلیائی کھلاڑی اسٹیو اسمتھ کو گیند نہیں کرانا چاہتے تھے۔اس کی وجہ یہ تھی کہ اسمتھ کے ہیلمٹ پر کیمرہ نصب تھا، اور اشوِن نہیں چاہتے تھے کہ وہ ٹی 20 ورلڈ کپ سے قبل اسٹیو اسمتھ ان کی جادوئی اسپن بولنگ کا راز اور ٹپس ریکارڈ کریں۔ محمد کیف کا کہنا تھا کہ اشوِن بطور ساتھی کھلاڑی اسمتھ کی مدد کرنے کے لیے تیار تھے لیکن ورلڈ کپ کے لیے نہیں۔خیال رہے کہ بھارت کے نامور اسپنر روی چندر اشوِن نے آسٹریلیا کے خلاف بارڈر گواسکر ٹرافی سیریز کے تیسرے میچ کے اختتام پر 18 دسمبر کو انٹرنیشنل کرکٹ سے ریٹائرمنٹ کا اعلان کردیا تھا۔ انہوں نے 106 ٹیسٹ میچز میں بھارت کی نمائندگی کرتے ہوئے 537 وکٹیں حاصل کیں جب کہ 116 ون ڈے انٹرنیشنل میں 156 اور 65 ٹی 20 انٹرنیشنل میں 72 وکٹیں حاصل کیں۔

کریڈٹ : انڈیپنڈنٹ نیوز پاکستان-آئی این پی