سابق کپتان پاکستان کرکٹ ٹیم وسیم اکرم نے کہا ہے کہ اولمپک گولڈ میڈلسٹ ارشد ندیم نے جو کارنامہ انجام دیا اس سے پوری دنیا دنگ رہ گئی ہے،میلبرن میں میڈیا سے گفتگو کرتے ہو ئے سابق کپتان وسیم اکرم نے کہا کہ ہمارے ملک میں ٹیلنٹ ہے، بس ٹیلنٹ کو مواقع نہیں ملتے لیکن ارشد ندیم نے اپنی محنت اور اپنے مواقع سے جو کیا اس سے پوری دنیا دنگ رہ گئی ہے، ہم پاکستانی ہونے کی حیثیت سے تو فخر کر ہی رہے ہیں لیکن پوری دنیا اس کے کارنامے پر فخر کر رہی ہے۔انہوں نے کہا کہ ارشد ندیم نے جو کارنامہ انجام دیا اس سے پوری قوم کو ایک امید ملی ہے کہ ہمارے ہاں جو ٹیلنٹ ہے اسے مواقع اور سہولیات دی جائیں تو وہ مزید کارنامے انجام دے سکتا ہے، پاکستان میں مسئلہ یہ ہے کہ سہولیات نہیں ہیں، ٹیلنٹ کو نکھارا نہیں جاتا اس کیلئے تمام اسپورٹس باڈیز کو مل کر سوچنا ہو گا کہ کیسے فنڈز لانے ہیں، ہمیں چاہیے کہ اکٹھے بیٹھیں، پلان کریں اور مخصوص اسٹیڈیمز بنائیں، اگر نوجوانوں کو مواقع نہیں دیں گے تو وہ فون پر ہی لگے رہیں گے۔وسیم اکرم نے نیرج چوپڑا کو مبارکباد دیتے ہوئے کہا کہ نیرج چوپڑا کو بھی مبارکباد دوں گا، وہ کیا اسپورٹس مین ہے، ارشد ندیم اور نیرج چوپڑا کی ماں نے بہت اچھا پیغام دیا ہے، اسپورٹس سیاست سے الگ ہے، لوگوں کا آپس میں رابطہ اہم ہے، دونوں کے والدین نے پوری دنیا میں مثبت تاثر بھیجا اور ارشد ندیم نے بھی کمال کیا انھیں بھی مبارکباد دیتا ہوں۔اولمپکس میں کرکٹ کی شمولیت پر وسیم اکرم کا کہنا تھا کہ اولمپکس میں کرکٹ کو شامل کر لیا گیا ہے، امید ہے کہ اگلے اولمپکس میں کرکٹ ہو گی اور یہ ٹی 20فارمیٹ میں ہی ہو گی اور ہونی بھی ٹی ٹوئنٹی فارمیٹ میں چاہیے، بریک ڈانس آگیا ہے تو کرکٹ کو بھی اولمپکس میں آنا چاہیے۔ وسیم اکرم نے کہا کہ چیمپئنز ٹرافی کا پاکستان میں ہونا بڑی بات ہے، اس کے لیے چیئرمین محسن نقوی اسٹیڈیم اپ گریڈ کر رہے ہیں، میرا ماننا صرف یہ ہے کہ فینز کو پیار سے اسٹیڈیم پہنچائیں اور سہولتیں دیں، سکیورٹی بہت ضروری ہے لیکن فینز کو تکلیف نہیں ہونی چاہیے تاکہ وہ اسٹیڈیم آئیں اور انجوائے کریں۔

کریڈٹ: انڈیپنڈنٹ نیوز پاکستان-آئی این پی