پاکستان کو ہرانے کے بعد امریکی کرکٹر رسٹی تھیرون نے فاسٹ باولر حارث رئوف پر بال ٹیمپرنگ کا الزام لگا دیا۔امریکی کرکٹر رسٹی تھیرون نے ایکس پر کی گئی پوسٹ میں حارث رئوف پر بال ٹیمپرنگ کا الزام عائد کرتے ہوئے لکھا کہ میچ کے دوران حارث نے انگوٹھے کے ناخن کا استعمال کرتے ہوئے گیند کے ساتھ چھیڑ چھاڑ کرنے کی کوشش کی۔انہوں نے اپنی پوسٹ میں بین الاقوامی کرکٹ کونسل (آئی سی سی)کے ایکس ہینڈل کو ٹیگ کرتے ہوئے سوال کیا کہ کیا ایسا دکھانے کی کوشش کی جا رہی ہے کہ باولر نے نئی گیند کے ساتھ کوئی چھیڑ چھاڑ نہیں کی؟ تو گیند تبدیل ہونے کے محض دو اوورز بعد کیسے سوئنگ ہونے لگی؟واضح رہے کہ 6 جون کو آئی سی سی ٹی ٹوئنٹی مینز کرکٹ ورلڈ کپ کے 11 ویں میچ میں میزبان امریکہ نے پاکستان کو سپر اوور میں 5 رنز سے شکست دی تھی۔امریکا نے سپر اوور میں پاکستان کو 19 رنز کا ہدف دیا تھا جس کے تعاقب میں قومی ٹیم ایک وکٹ پر 13 رنز بناسکی۔

کریڈٹ: انڈیپنڈنٹ نیوز پاکستان-آئی این پی