انٹرنیشنل کرکٹ کونسل (آئی سی سی)ٹی ٹوئنٹی ورلڈکپ کے سپر 8مرحلے کے پہلے میچ میں جنوبی افریقا نے امریکا کو 18رنز سے شکست دے دی۔جنوبی افریقا کے 195رنز کے ہدف کے تعاقب میں امریکی ٹیم مقررہ اوورز میں 6وکٹوں کی نقصان پر 176رنز بنا سکی۔ویسٹ انڈیز میں اینٹیگا،نارتھ سائونڈ میں کھیلے گئے میچ میں امریکا نے ٹاس جیت کر جنوبی افریقا کو بیٹنگ کی دعوت دی۔جنوبی افریقا کی جانب سے اننگز کا آغاز مایوس کن رہا اور ابتدا میں ہی 16کے مجموعی اسکور پر پہلی وکٹ گری۔اس کے بعد ڈی کک اور کپتان ایڈن مارکرم نے ذمہ دارانہ بیٹنگ کی اور 110رنز کی پارٹنر شپ بنا کر بڑے ہدف کیلئے راہ ہموار کی۔مقررہ 20اوورز میں جنوبی افریقا نے 4وکٹوں کی نقصان پر 194رنز بنائے۔ کوئنٹن ڈی کک 74اور ایڈن مارکرم 46 رنزبنا کر نمایاں رہے جبکہ کلاسن 36رنزبناکرناقابل شکست رہے۔امریکا کے سوربھ نٹراواکر اور ہرمیت سنگھ نے دو دو وکٹیں حاصل کیں۔جنوبی افریقا کے 195رنز کے ہدف میں امریکا کی جانب سے اننگز کا آغاز مستحکم رہا اور پہلی وکٹ 33رنز پر ٹیلر کی گری۔اس کے بعد نتیش، جونس، کورے اینڈرسن اور شایان جہانگیر بالترتیب 8، صفر، 12اور 3رنز بنا کر پویلین لوٹ گئے۔ اینڈریزگوس اور ہرمیت نے جارحانہ بیٹنگ کی اور چھٹی وکٹ کی شراکت میں 91رنز بنا کر ٹیم کو میچ میں واپس لے آئے تاہم ہرمیت 38رنز بناکر کیچ آئوٹ ہوگئے۔اینڈریزگوس کی 80رنز کی ناقابل شکست اننگز رائیگاں گئی اور امریکا کی ٹیم مقررہ 20اوورز میں 6وکٹوں کے نقصان پر 176رنز بناسکی اور یوں اسے 18رنز سے شکست کا سامنا کرنا پڑا۔ جنوبی افریقا کے ربادا نے 3کھلاڑیوں کو آئوٹ کیا جبکہ فاتح ٹیم کے کوئنٹن ڈی کک 74رنزبناکرپلیئرآف دی میچ قرارپائے۔

کریڈٹ: انڈیپنڈنٹ نیوز پاکستان-آئی این پی