افغانستان کرکٹ ٹیم کے لیگ اسپنر راشد خان ایشیا کپ کے سپر فور مرحلے میں بھی کارکردگی کے تسلسل کو برقرار رکھنے کے لیے پر عزم ہیں،نجی ٹی وی سے گفتگو کرتے ہوئے راشد خان نے کہا کہ ایشیا کپ میں اب تک اچھے میچز رہے ہیں، اب سپر فور پر فوکس ہے اور کوشش ہے کہ کارکردگی کے تسلسل کو برقرار رکھیں،ان کا کہنا تھا کہ تمام کھلاڑیوں نے پہلے مرحلے میں ذمہ داری کا ثبوت دیا ہے، سپر فور مرحلے میں کوشش ہو گی کہ جو غلطیاں پہلے مرحلے میں کیں ان کو نہ دہرائیں،ورلڈ کلاس اسپنر نے کہا کہ تمام ایشیائی ٹیموں نے ان کنڈیشنز میں بہت کھیلا ہوا ہے اس لیے افغانستان سمیت کوئی ٹیم یہاں انجان نہیں ہے کیونکہ کوئی ٹیم یورپ سے نہیں آئی سب کو یہاں کے موسم اور پچز کا پتہ ہے، اس لیے کسی کو یہاں مشکل نہیں ہے،لیگ اسپنر نے کہا کہ ہم سب کی کوشش یہی ہے کہ تیاری اچھی ہو اور میدان میں اچھا کھیلیں، ہم بحثیت ٹیم ایشیا کپ میں 100فیصد دینے کی کوشش کر رہے ہیں،راشد خان کا کہنا تھا کہ ہماری بولنگ ہمیشہ سے اچھی رہی ہے، کنڈیشنز کے مطابق کھیلتے ہیں، فاسٹ بولر فضل حق فاروقی نے بھارتی لیگ میں اچھا پرفارم کیا، انہیں ایکسپوژر ملا اور انہوں نے جو معیار قائم کیا سب اس تک پہنچنا چاہتے ہیں،افغان اسپنر کا کہنا تھا ہم کوشش کرتے ہیں کہ فاسٹ بولنگ میں اٹیک کریں اور پھر مڈل میں اسپنرز کے لیے تھوڑی آسانی ہوتی ہے۔

کریڈٹ: انڈیپنڈنٹ نیوز پاکستان-آئی این پی