پاکستان فلم انڈسٹری کے سنہرے دور کی ناموراداکارہ و ہدایت کارہ شمیم آرا کو دنیا چھوڑے 8 برس بیت گئے ۔1938 میں علی گڑھ میں پیدا ہونے والی اداکارہ نے اپنے فنی سفر کا آغاز 1956 میں بننے والی فلم کنواری بیوہ سے کیا تاہم 60 کی دہائی میں بننے والی فلم سہیلی نے انہیں پاکستان فلم انڈسٹری کی ٹاپ کی ہیروئنوں کی صفوں میں لا کھڑا کر دیا۔شمیم آرا نے وحید مراد، محمد علی، سنتوش کمار، درپن اور ندیم سمیت اپنے دور کے سپر اسٹاروں کے ساتھ کام کیا لیکن اداکار وحید مراد کے ساتھ ان کی جوڑی کو خوب پسند کیا گیا۔دو دہائیوں تک ادکاری کے جوہر دکھانے کے بعد شمیم آرا نے فلم پروڈکشن اور ڈائریکشن کے شعبے میں قسمت آزمائی اور کئی نئے چہرے متعارف کروائے۔شمیم آرا کی بطور اداکارہ سپر ہٹ فلموں میں دیوداس ، صاعقہ، لاکھوں میں ایک، انارکلی، فرنگی قابل ذکر ہیں جبکہ بطور ہدایت کارہ انہوں نے فلم پلے بوائے، مس ہانگ کانگ، لیڈی اسمگلر، ہاتھی میرا ساتھی اور منڈا بگڑا جائے جیسی لازوال فلمیں بنائیں۔ شمیم آرا کو اداکاری میں چھ نگار ایوارڈ حاصل کرنے کے ساتھ ہدایتکاری میں بھی تین نگار ایوارڈ زحاصل کرنے کا منفرد ااعزاز حاصل ہے۔دماغ کی شریان پھٹنے کے باعث شمیم آرا کئی برس تک علیل رہیں اور 5 اگست 2016 کو لندن میں انتقال کرگئیں۔

کریڈٹ: انڈیپنڈنٹ نیوز پاکستان-آئی این پی