عالمی شہرت یافتہ پاکستانی گلوکار عاطف اسلم نے ابوظہبی میں منعقدہ حالیہ کانسرٹ میں بھارتی آنجہانی گلوکارہ لتا منگیشکر کو خراج عقیدت پیش کیا ہے ۔سوشل میڈیا پر ایک ویڈیو خوب وائرل ہورہی ہے جس میں عاطف اسلم کو کانسرٹ میں پرفارم کرتے دیکھا جاسکتا ہے۔گزشتہ روز اتحاد ایرینا میں جاری اس میوزک کانسرٹ میں عاطف اسلم اور پاکستانی گلوکارہ عابدہ پروین نے اپنی سحر انگیز آواز کا جادو جگایا جہاں موجود موسیقی سے لگا رکھنے والے ہزاروں لوگ انہیں داد دیے بنا نہ رہ سکے۔اس کانسرٹ میں عاطف اسلم نے کئی گانے پیش کیے جس کی دلکش ویڈیوز سوشل میڈیا کی زینت بنی ہوئی ہیں تاہم اس دوران انہوں نے مشہور گانا ایک پیار کا نغمہ کو اس انداز سے پیش کیا کہ محفل میں جان ڈالتے ہوئے وہاں موجود لوگوں کو جھومنے پر مجبور کردیا۔دراصل یہ گانا عاطف اسلم نے بھارتی آنجہانی گلوکارہ لتا منگیشکر کو خراج عقیدت پیش کرنے کیلئے گایا جو انکے مداحوں کو بھی خوب پسند آیا۔تبصرہ کرتے صارفین میں نہ صرف پاکستانی شائقین بلکہ بھارت سے تعلق رکھنے والے میوزک کے متوالوں نے بھی عاطف اسلم کے اس خوبصورت گانے پر اپنی پسندیدگی کا اظہار کیا۔

کریڈٹ: انڈیپنڈنٹ نیوز پاکستان-آئی این پی