پاکستان کے خلاف ٹیسٹ سیریز کے دوسرے اور آخری میچ میں سری لنکا کی بیٹنگ جاری ہے اور میزبان ٹیم نے پہلے دن کے اختتام پر 6 وکٹوں کے نقصان پر 315رنز بنالیے ،سری لنکن بلے بازوں نے جم کر پاکستانی بائولرز کا مقابلہ کیا، دنیش چندیمل 80، اوشاڈا فرنینڈو نے 50، دیمتھ کرونارتنے 40 ، اینجلو میتھیوز 42 رنز بنا کر نمایاں بلے باز رہے۔پہلے دن کا کھیل ختم ہوا تو نروشن ڈکویلا42اور دنتھ ویلالیج6رنز بنا کر ناقابل شکست ہیں،پاکستان کی جانب سے محمد نواز نے2،نسیم شاہ،نعمان علی اور یاسر شاہ نے ایک ایک کھلاڑی کو آئوٹ کیا۔اتوار کوسری لنکا کے گال اسٹیڈیم میں شروع ہونے والے دوسرے ٹیسٹ میں میزبان ٹیم کے کپتان نے ٹاس جیت کر پہلے بیٹنگ کا فیصلہ کیا۔دوسرے میچ کے لیے قومی کرکٹ ٹیم میں 2تبدیلیاں کی گئی ہیں، گزشتہ میچ میں حیران کن طور پر ٹیم سے ڈراپ کیے گئے مڈل آرڈر بلے باز فواد عالم کی ٹیم میں واپسی ہوئی ہے جبکہ تجربہ کار کھلاڑی اظہر علی پلیئنگ الیون کا حصہ نہیں ہیں،

انجرڈ شاہین شاہ آفریدی کی جگہ اسپنر نعمان علی ٹیم میں شامل ہوئے ہیں۔سری لنکا کی جانب سے اوپنر اوشاڈا فرنینڈو نے 50 رنز بنائے، انہیں اسپنر محمد نواز نے نشانہ بنایا اور وکٹوں کے پیچھے محمد رضوان نے ان کا کیچ پکڑا۔سری لنکا کے دوسرے آئوٹ ہونے والے کھلاڑی کوشال مینڈس تھے جو 3کے انفرادی اسکور پر آغا سلمان کے ہاتھوں رن آئوٹ ہوگئے۔سری لنکا کے تیسرے آئوٹ ہونے والے کھلاڑی دیمتھ کرونارتنے تھے، انہیں لیگ اسپنر یاسر شاہ نے پویلین کا راستہ دکھایا، وہ 40 رنز بنا کر فاسٹ بالر نسیم شاہ کو کیچ تھما بیٹھے۔اینجلو میتھیوز اور دنیش چندیمل کے درمیان 75 رنز کی پارٹنرشپ کا خاتمہ ہوا، اینجلو میتھیوز 42 رنز بنا کر محمد نعمان کی گیند پر وکٹ کیپر محمد رضوان شکار بنے۔اس وقت سری لنکا کی ٹیم نے چار وکٹوں کے نقصان پر 195 رنز بنائے تھے۔پانچویں وکٹ کے لیے چندیمل اور ڈی سلوا نے 63 رنز کی شراکت قائم کرکے سری لنکا کی پوزیشن قدرے بہتر کردی، دنیش چندیمل 80 رنز بنا کر محمد نواز کی گیند پر فواد عالم کو کیچ دے بیٹھے۔ٹیسٹ میچ کے پہلے دن کی آخری وکٹ ڈی سلوا کی گری وہ 33 رنز بنا کر نسیم شاہ کا شکار بنے۔

کریڈٹ:
انڈیپنڈنٹ نیوز پاکستان-آئی این پی