سمندری طوفان شکتی کے باعث کوئٹہ مٹی کے طوفان کی لپیٹ میں آگئے، جس کے باعث حد نگاہ بھی کم ہوکررہ گئی ۔تفصیل کے مطابق سمندری طوفان شکتی کے اثرات بلوچستان تک پہنچ گئے، وسطی اور شمالی بلوچستان کے کئی علاقے شدید گرد و غبار اور مٹی کے طوفان کی لپیٹ میں آگئے۔جس کے باعث صوبائی دارالحکومت کوئٹہ میں فضا گرد آلود ہونے سے حدِ نگاہ انتہائی کم ہوگئی ، شدید گرد آلود موسم کے باعث شہریوں، خصوصا دمہ اور سانس کے مریضوں کو مشکلات کا سامنا ہے۔محکمہ موسمیات نے بتایا کہ مکران کی ساحلی پٹی کے قریب سے گزرنے والے سمندری طوفان شکتی کے نتیجے میں ہواں کا رخ سمندر کی جانب ہو گیا ہے، جس کے باعث قندھار سے اٹھنے والا گردوغبار وسطی بلوچستان تک پھیل گیا۔ڈپٹی ڈائریکٹر محکمہ موسمیات کا کہنا ہے کہ آئندہ 24 سے 36 گھنٹوں کے دوران موسم بتدریج صاف ہونا شروع ہو جائے گا تاہم کوئٹہ اور چمن میں خشک اور ٹھنڈی ہوائوں نے موسم کو مزید سرد کر دیا ہے۔

دوسری جانب بالائی علاقوں میں پڑنے والی برفباری نے ٹھنڈ کی شدت بڑھادی، دیامراورچلاس میں برفباری سیہرسو سفیدی چھا گئی۔کاغان کے پہاڑوں نے برف کی چادراوڑھ لی،بابو سر ٹاپ پرچودہ انچ برف پڑچکی ہے جبکہ جھیل سیف الملوک،بٹہ کنڈی، جلکھڈ، بیسر، نوری ٹاپ میں بھی برفباری ہوئی۔کالام میں موسم سرما کی پہلی برفباری سے درجہ حرارت میں نمایاں کمی کردی ہے جبکہ شانگلہ کے پہاڑوں پر بھی برفباری نے موسم ٹھنڈا کردیا ہے۔ دوسری جانب موسمیاتی تبدیلیوں کے باعث گلگت بلتستان میں واقع دنیا کے بلند ترین پہاڑی سلسلوں میں گزشتہ چند سالوں سے سردی کا دورانیہ مختصر ہوگیا ہے۔ رپورٹ کے مطابق گزشتہ چند سالوں میں برفباری بھی معمول سے کم ہوتی رہی جب کہ رواں سال برفباری قبل از وقت شروع ہوگئی ہے۔حکام کے مطابق بلتستان ڈویژن میں درجہ حرارت نقطہ انجماد سے بھی نیچے گر گیا جب کہ استور میں قبل از وقت برفباری سے معمولات زندگی متاثر ہیں۔

کریڈٹ: انڈیپنڈنٹ نیوز پاکستان-آئی این پی