صدرِ مملکت آصف علی زرداری ،وزیر اعظم شہبازشریف اور دیگر سیاسی رہنمائوں نے بلوچستان کے ضلع مستونگ میں سکیورٹی فورسز پر فتنہ الہندوستان کے دہشت گردوں کے حملے کی شدید الفاظ میں مذمت کی ہے۔ایوان صدر سے جاری بیان کے مطابق صدر مملکت آصف زرداری نے کہا ہے کہ بھارت کی سرپرستی میں سرگرم دہشت گرد عناصر کا جلد قلع قمع کیا جائے گا اور پاکستان کی سلامتی و خودمختاری پر کوئی سمجھوتہ نہیں کیا جائے گا۔انہوں نے اس بزدلانہ کارروائی کو ریاست پاکستان کے خلاف دشمن عناصر کی مایوس کن سازش قرار دیا اور میجر محمد رضوان طاہر، نائیک ابنِ امین اور لانس نائیک محمد یونس کو زبردست خراجِ عقیدت پیش کرتے ہوئے ان کے بلند درجات اور اہلِ خانہ کے لیے صبر جمیل کی دعا کی۔ میں صدر آصف علی زرداری نے کہا کہ قوم اپنے بہادر شہدا کی عظیم قربانیوں کو سلام پیش کرتی ہے۔انہوں نے سکیورٹی فورسز کی بروقت اور جرات مندانہ کارروائی کو سراہتے ہوئے کہا کہ جوابی حملے میں دہشت گردوں کو جہنم واصل کرنا فورسز کی پیشہ ورانہ مہارت اور قومی عزم کی عکاسی کرتا ہے۔ وزیر اعظم شہباز شریف نے مستونگ واقعہ کی مذمت کرتے ہوئے شہدا کے درجات کی بلندی کے لیے دعا کی اور لواحقین کے ساتھ تعزیت کا اظہار کیا۔وزیراعظم نے کہا کہ ملک سے ہر قسم کی دہشت گردی کے مکمل خاتمے کے لیے پر عزم ہیں، سکیورٹی فورسز کے جوان ملک کی حفاظت کے لیے سیسہ پلائی ہوئی دیوار کی طرح کھڑے ہیں۔

انہوں نے کہا کہ سکیورٹی فورسز کے اہلکاروں کی قربانیاں بے مثال ہیں، دہشت گردوں کا مکمل خاتمہ کیا جائے گا۔ اسپیکر قومی اسمبلی سردار ایاز صادق نے مستونگ سیکیورٹی فورسز کے گاڑی کے قریب دھماکے کی شدید مذمت کرتے ہوئے سیکیورٹی فورسز کے بہادر جوانوں کے جانی نقصان پر گہرے دکھ اور افسوس کا اظہار کیا ہے ۔اپنے بیان میں اسپیکر قومی اسمبلی نے شہید میجر رضوان طاہر، نائیک ابن امین اور لانس نائیک محمد یونس کو خراج عقید ت پیش اور کہا شہدا کے اہلخانہ سے دلی ہمدردی اور تعزیت کا اظہار کیا ۔انہوں نے کہا شہدا کے اہلخانہ کے غم میں برابر کا شریک ہوں۔ دہشتگردی کی بزدلانہ کارروائیاں قوم کے حوصلے پست نہیں کر سکتیں ۔شہدا کی قربانیاں رائیگاں نہیں جائیں گی، سردار ایاز صادق کا کہناتھا قوم اپنے بہادر سپوتوں پر فخر کرتی ہے۔بھارتی سرپرستی میں دہشتگردی خطے کے امن کے لیے خطرہ ہے، دہشتگردوں کے خلاف سیکیورٹی فورسز کی کارروائیاں قابل تحسین ہیں، سردار ایاز صادق نے کہا پارلیمنٹ اور قوم شہدا کے خاندانوں کے غم میں برابر کی شریک ہیں ۔ وزیر اعلی بلوچستان میر سرفراز بگٹی نے کہا کہ مستونگ میں بھارتی حمایت یافتہ دہشتگردی کی شدید الفاظ میں مذمت کرتے ہیں۔

وزیراعلی بلوچستان میر سرفراز بگٹی نے کہا کہ یہ حملہ پاکستان کے امن اور استحکام پر حملہ ہے، دشمن کے عزائم ناکام ہوں گے، ہمارے جوانوں کی شہادتیں رائیگاں نہیں جائیں گی، دشمن کو ہر محاذ پر جواب دیں گے، میجر رضوان طاہر اور ان کے ساتھیوں نے مادرِ وطن پر جان نچھاور کی۔سرفراز بگٹی کا کہنا تھا کہ پوری قوم شہدا کی مقروض ہے، دہشتگردی کے ہر واقعہ کا حساب لیا جائے گا، قاتلوں کو انجام تک پہنچائیں گے، قوم اپنے شہدا کے ساتھ کھڑی ہے، ان کے خاندانوں کو تنہا نہیں چھوڑیں گے۔ادھر وزیراعلی پنجاب مریم نواز شریف نے مستونگ میں سکیورٹی فورسز کی گاڑی کے قریب دھماکے کی مذمت کرتے ہوئے میجر رضوان طاہر، نائیک ابن امین اور لانس نائیک محمد یونس کی قربانی کو لازوال قرار دیا ہے۔وزیراعلی پنجاب نے سوگوار خاندانوں سے اظہار ہمدردی و تعزیت کیا ہے۔علاوہ ازیں گورنر خیبرپختونخوا نے مستونگ میں سکیورٹی فورسز پر حملہ کی مذمت کرتے ہوئے افسروں اور جوانوں کو لازوال قربانیوں پر سلامت پیش کیا ہے۔فیصل کریم کنڈی نے کہا کہ وطن کے بہادرسپوتوں کی ملک و قوم کے لیے قربانیاں رائیگاں نہیں جائیں گی، دہشت گردوں کے خلاف جنگ میں پوری قوم اپنی مسلح افواج کے ساتھ متحد کھڑی ہے۔

کریڈٹ: انڈیپنڈنٹ نیوز پاکستان-آئی این پی