وفاقی وزیر مذہبی امور و بین المذاہب ہم آہنگی چوہدری سالک حسین نے کہا ہے کہمدارس میں جدید تعلیم کی فراہمی کے لئے حکومت ہر ممکن تعاون کے لئے تیار ہے، میری وزارت کے دروازے علماکرام کے لئے ہر وقت کھلے ہیں ۔ ان خیالات کا اظہار انہوں نے منگل کو وفاق المدارس کے زیر انتظام امتحانی مرکز جامعہ محمدیہ کے دورے کے موقع پر میڈیا سے گفتگوکرتے ہوئے کیا۔وفاقی وزیر نے وفاق المدارس کے زیر انتظام امتحانات کا جائزہ لیا اور وفاق المدارس کے تحت قائم شدہ امتحانی مرکز کے نظام پر اطمینان کا اظہار کیا۔اس موقع پر وفاقی وزیر نے کہا کہ وفاق المدارس کا تعلیمی اور امتحانی نظام انٹرنیشنل معیار سے ہم آہنگ اور تعلیمی اداروں کے لئے رول ماڈل ہے۔ دینی مدارس کا اپنا ایک مخصوص نصاب ہوتا ہے جو انتہائی پاکیزہ اور نورانی ماحول میں پڑھا یا جاتا ہے۔ بلا شبہ اسلام کی ترویج و اشاعت میں دینی مدارس ،مساجد اور علما کرام کا بنیادی اور کلیدی کردار رہا ہے۔دینی مدارس کا وجود ہر دور میں مسلم ہے، جس طرح روزِ اول اس کی اہمیت تھی، آج بھی اتنی ہی اہمیت ہے۔انہوں نے کہاکہ موجودہ دور میں صحیح اسلامی علوم ان ہی مدارس میں پڑھائے جاتے ہیں۔ مدارس وہ مراکز ہیں جس سے منسلک رہ کر مسلمان اپنے دین کی حفاظت اور عقائد کو درست کرسکتے ہیں۔

چوہدری سالک حسین نے کہاکہ میرے والد چوہدری شجاعت حسین کا مدارس اور علما سے خصوصی لگا اور تعلق ہے، انہوں نے ہمیشہ مدارس کے لئے آواز بلند کی ۔ مولانا تقی عثمانی صاحب، مولانا حنیف جالندھری، دیگر علما کا معاشرے کی اصلاح کے لئے بہت اہم کردار ہے ۔دینی مدارس جہاں اسلام کے قلعے، ہدایت کے سر چشمے، دین کی پناہ گاہیں اور اشاعت دین کا بہت بڑا ذریعہ ہیں۔ مدارس دنیا کی سب سے بڑی این جی اوز بھی ہیں جو لاکھوں طلبہ وطالبات کو بلا معاوضہ تعلیم و تربیت کے زیور سے آراستہ کرنے کے ساتھ ساتھ انہیں رہائش و خوراک اور مفت طبی سہولیات بھی فراہم کرتے ہیں۔ انہوں نے کہا کہ مدارس معاشرہ میں بنیادی تعلیم اور خواندگی کے تناسب میں معقول اضافہ کا باعث بن رہے ہیں۔ مدارس اسلام کے خاندانی نظام اور کلچر وثقافت کی حفاظت کر رہے ہیں اور غیر اسلامی ثقافت و کلچر کی یلغار کے مقابلے میں مسلمانوں کے لئے مضبوط حصار کی حیثیت رکھتے ہیں۔ مدارس میں طالبات کی تعداد طلبہ سے زیادہ ہے اور مدارس کے ذریعے ایسے ایسے علاقوں میں بھی لڑکیوں کو تعلیم دی جا رہی ہے جہاں لڑکیاں کئی وجوہات کی بنا پر تعلیم سے محروم تھیں۔انہوں نے کہاکہ ضرورت اس امرکی ہے کہ دینی مدارس کے اندر ہی ایسے کورسز کا اہتمام کیا جائے کہ دینی مدارس کے طلبا دین کے ساتھ ساتھ مختلف پیشوں کی تربیت بھی حاصل کر سکیں۔ مدارس میں جدید تعلیم کی فراہمی کے لئے حکومت ہر ممکن تعاون کے لئے تیار ہے ۔ میری وزارت کے دروازے علماکرام کے لئے ہر وقت کھلے ہیں۔

کریڈٹ: انڈیپنڈنٹ نیوز پاکستان-آئی این پی