پی ٹی آئی رہنما اور قومی اسمبلی میں اپوزیشن لیڈر عمرایوب نے کہا ہے کہ افواج پاکستان ملک کی فوج ہے اور قربانیاں دے رہی ہے، بلوچستان میں جو سانحہ ہوا اس پر دکھ ہے، شہدا کے خاندانوں کے ساتھ ہیں، اس واقعے کی شدید مذمت کرتے ہیں۔ان خیالا ت کااظہار انہوں نے لاہور میں انسداد دہشت گردی عدالت کے باہر میڈیا سے گفتگو کرتے ہوئے کیا ۔ عمر ایوب نے کہا کہ میں نے 5، 6 ماہ قبل بلوچستان کے بارے میں بات کی تھی۔ کوٹ لکھپت جیل میں ڈاکٹر یاسمین راشد ،سینٹر اعجاز چوہدری ،شاہ محمود قریشی سمیت دیگر اسیران سے ملاقات کرنا چاہتا ہوں۔ وکلا کو کہا ہے عدالت میں ملاقات کرنے کے لیے اجازت کی درخواست دیں۔اس سے قبل انسداد دہشت گردی عدالت لاہور میں 9 مئی جناح ہائوس, عسکری ٹاور حملہ اور تھانہ شادمان نذر آتش مقدمات میں عمر ایوب کی درخواست ضمانت پر سماعت ہوئی۔ عدالت نے عمر ایوب کی عبوری ضمانت میں 8 اپریل تک توسیع کردی۔ انسداد دہشتگردی عدالت کے جج منظر علی گل کی رخصت کے باعث 3 مقدمات میں عبوری ضمانت پر درخواستوں کی سماعت نہ ہو سکی۔عمر ایوب اپنے وکیل کے ہمراہ عدالت میں پیش ہوئے۔ عدالت نے عمر ایوب کی عبوری ضمانت میں اج تک توسیع کر رکھی تھی۔ عمر ایوب سمیت دیگر پی ٹی آئی رہنماون پر بغاوت اور کارکنان کو جلائو گھیرائو پر اکسانے کا الزام ہے۔

کریڈٹ: انڈیپنڈنٹ نیوز پاکستان-آئی این پی