سعودی عربین ایئر لائنز (السعودیہ)نے سعودی عرب کے قومی دن یومِ وطنی پر داخلی پروازوں سے متعلق خصوصی پیشکش کر دی۔سعودی میڈیا کے مطابق السعودیہ نے ٹوئٹر پر بیان میں کہا کہ خصوصی پیشکش سعودی عرب کے تمام ایئرپورٹس کیلیے اور یکطرفہ ٹکٹ پر ہے۔بکنگ 21 سے 23 ستمبر 2022 کے دوران کرانا ہوگی جبکہ اس ٹکٹ پر سفر یکم جنوری سے 31 مارچ 2023 کے دوران کیا جاسکے گا۔ السعودیہ نے بیان میں کہا کہ خصوصی پیشکش اکانومی اور گیسٹ کلاس کی براہ راست پروازوں کے لیے ہے۔ اکانومی کلاس کا ٹکٹ 92 اور گیسٹ کلاس کا ٹکٹ 192 ریال میں دستیاب ہے۔ خصوصی پیشکش محدود نشستوں کے لیے اور پہلے آ پہلے پا کی بنیاد پر ہے۔دوسری جانب سعودی عرب کے 92 ویں قومی دن کے موقع پرملک بھر کے شہریوں نے ریاست کے ساتھ اپنی حب الوطنی، محبت اور وفاداری کا اظہارکیا ہے جبکہ وہ پریڈ، آتش بازی اور تفریحی شوز کے ذریعہ جشن منانے کی تیاری کر رہے ہیں۔دارالحکومت ریاض میں سعودی عرب کا قومی دن منانے کی تیاریاں عروج پرہیں۔اس موقع پر شہر کی مرکزی شاہراہوں کو قومی پرچم سے سجایا گیا ہے، ٹاورزاور عمارتوں کو سبزروشنیوں سے ڈھانپ دیا گیا ہے۔

کریڈٹ: انڈیپنڈنٹ نیوز پاکستان-آئی این پی