افریقی ملک روانڈا میں 10سے زائد افراد کو قتل کر کے گھر کے کچن میں دفن کرنے والے سیریل کلر کو گرفتار کر لیا گیا،غیر ملکی میڈیا کے مطابق روانڈا کے دارالحکومت کیگالی میں ایک ایسے شخص کو گرفتار کیا گیا ہے جس کے گھر سے 10سے زائد افراد کی لاشیں برآمد ہوئیں جنہیں ملزم نے اپنے کچن میں کھودے گئے ایک گڑھے میں دفنا رکھا تھا،پولیس حکام کے مطابق 34سالہ مشتبہ سیریل کلر نے تمام افراد کو قتل کر کے کیگالی کے مضافاتی علاقے کیکوکیرو میں اپنے کرائے کے گھر میں دفن کیا، ملزم کو ابتدائی طور پر جولائی میں ڈکیتی اور دیگر جرائم کے علاوہ عصمت دری کے شبہ میں گرفتار کیا گیا تھا لیکن شواہد کی کمی کی وجہ سے اسے ضمانت دے دی گئی ،تاہم تحقیقات جاری رہیں اور اسے رواں ہفتے دوبارہ گرفتار کر لیا گیا اور اس کے گھر کی تلاشی لی گئی جس کے نتیجے میں اس کے کچن کے اندر موجود ایک گڑھے میں سے لاشیں برآمد ہوئیں،بیورو حکام کے مطابق ملزم نے اعتراف کیا کہ اس نے مشہور سیریل کلرز کو دیکھ کر قتل کرنا سیکھا اور اس نے چند مقتولین کو تیزاب میں بھی ڈالے رکھا،ملزم اپنے شکار کا تعاقب کرنے سے پہلے ان کے بارے معلومات حاصل کرتا تھا اور عام طور پر ان لوگوں کو اپنا شکار بناتا تھا جن کے تلاش کرنے والے نہیں ہوتے تھے، ملزم نے تفتیش کے دوران اپنے جرم کا اعتراف کیا ہے اور ابتدائی تحقیقات سے معلوم ہوا ہے کہ مقتولین میں مرد اور خواتین شامل ہیں، ملزم زیادہ تر طوائفوں کو اپنے گھر لے جاتا تھا جہاں ان کا قیمتی سامان لوٹ کر انہیں گلا دبا کر قتل کر دیتا تھا اور بعدازاں ان کی لاشوں کو کچن میں کھودے گئے گڑھے میں دفن کر دیتا تھا۔

کریڈٹ: انڈیپنڈنٹ نیوز پاکستان-آئی این پی