امریکی صدر ڈونلڈ ٹرمپ کی انتظامیہ کے ایک رکن کے دورے روس کے بعد ماسکو نے امریکی قیدی کو رہا کر دیا، اس بارے میں وائٹ ہائوس کا کہنا ہے کہ یہ معاہدہ یوکرین جنگ کے خاتمے کے لیے بھی بہت اچھا ہے۔ غیرملکی خبر رساں ادارے کے مطابق وائٹ ہائوس کا کہنا ہے کہ ٹرمپ نے منشیات کے الزام میں 2021 سے جیل میں بند امریکی شہری مارک فوگل کی رہائی کو تبادلے کے ایک حصے کے طور پر یقینی بنایا ہے۔وائٹ ہائوس کا کہنا ہے کہ پراپرٹی ڈیولپر اور ٹرمپ کے قریبی دوست اسٹیو وٹکوف، جو مشرق وسطی میں ان کے سفیر کے طور پر کام کرتے ہیں، رہائی کے لیے کوشاں تھے، اور فوگل کے ساتھ روسی فضائی حدود سے باہر نکل رہے تھے۔دوسری جانب امریکی میڈیا نے رپورٹ کیا ہے کہ روس سے رہا ہونے والے اسکول ٹیچر مارک فوگل نے امریکی صدر سے وائٹ ہائوس میں ملاقات بھی کی۔واضح رہے کہ مارک ہیلیارڈ فوگل امریکی اسکول ٹیچر ہیں, جنہیں اگست 2021 میں روسی حکام نے 17 گرام چرس کے ساتھ روس میں داخل ہونے کی کوشش کرنے پر گرفتار کیا تھا، جون 2022 میں انہیں 14 سال قید کی سزا سنائی گئی تھی۔

کریڈٹ: انڈیپنڈنٹ نیوز پاکستان-آئی این پی