امریکہ میں 5 نومبر کو صدارتی انتخابات سے ایک ہفتہ قبل واشنگٹن اور وینکوور میں نصب تین بیلٹ باکسز میں آگ لگنے سے سینکڑوں ووٹ تباہ ہوگئے۔امریکی میڈیا کے مطابق دونوں شہروں میں دو بیلٹ ڈراپ باکسز کو آتشگیر مادے کے ذریعے آگ لگائی گئی، بیلٹ باکسز کے اندر آگ بجھانے کے خودکار نظام کے بروقت کام نہ کرنے کے باعث باکسز میں موجود سینکڑوں ووٹ تباہ ہوگئے۔میڈیا رپورٹس کے مطابق واشنگٹن اور وینکوور میں بیلٹ ڈراپ باکسز میں آتشزدگی سے قبل بھی ایک بیلٹ باکس کو آگ لگادی گئی تھی تاہم بیلٹ باکس کے اندر موجود آگ بجھانے والے سسٹم کی بدولت اس میں موجود بیشتر ووٹ محفوظ رہے۔ حکام کا ایک پریس کانفرنس میں کہنا تھا کہ دونوں واقعات میں استعمال کیے گئے آتشگیر مادے سے لگتا ہے کہ آتشزدگی کے دونوں واقعات کا آپس میں تعلق ہے، تاہم واقعات سے متعلق مزید تحقیقات جاری ہیں۔امریکی حکام نے بیلٹ باکسز کو آگ لگائے جانے کے واقعات کو جمہوریت پر حملہ قراردیتے ہوئے کہا کہ بیلٹ باکسز پر حملوں کے بعد ان سے ووٹ جمع کرنے کا عمل بڑھایا جائے گا اور متعدد بار وہاں سے ووٹ جمع کیے جائیں گے۔حکام نے بیلٹ باکسز میں اپنا ووٹ ڈالنے والے شہریوں سے متبادل بیلٹ حاصل کرنے کیلئے متعلقہ دفتر سے رابطہ کرنے کی درخواست کردی ہے۔واشنگٹن کے سیکرٹری آف اسٹیٹ اسٹیو ہوبس کا کہنا تھا کہ ووٹنگ کو متاثر کرنے والی کسی بھی دھمکی یا تشدد کو برداشت نہیں کیا جائے گا۔

کریڈٹ: انڈیپنڈنٹ نیوز پاکستان-آئی این پی