دنیا کے سب سے بڑے ناروے کے خودمختار دولت فنڈ نے کہا ہے کہ اس نے اسرائیل کے بیزیک ٹیلی کام میں اپنے تمام حصص فروخت کر دیئے ہیں کیونکہ یہ مقبوضہ مغربی کنارے میں اسرائیلی بستیوں کو ٹیلی کام خدمات فراہم کرتا ہے۔عرب میڈیا کے مطابق فنڈ کے اخلاقیات پر نظر رکھنے والے ادارے کونسل آن ایتھکس نے مقبوضہ فلسطینی علاقوں میں اسرائیل کی خدمات میں مدد کرنے والے کاروباروں کے لیے اخلاقی معیارات کی ایک نئی اور سخت تشریح اپنائی ہے جس کے بعد یہ فیصلہ سامنے آیا ہے۔بیزیک اسرائیل کا سب سے بڑا ٹیلی کام گروپ ہے۔کونسل آن ایتھکس نے مالی روابط منقطع کرنے کے لیے اپنی سفارشات میں کہا، "اپنی ظاہری موجودگی اور مغربی کنارے میں اسرائیلی بستیوں کو ٹیلی کام خدمات کی فراہم کر کے کمپنی ان بستیوں کی بحالی اور توسیع میں مدد دے رہی ہے جو بین الاقوامی قانون کے تحت غیر قانونی ہیں۔"نیز کہا گیا، "ایسا کر کے کمپنی خود بین الاقوامی قانون کی خلاف ورزی میں حصہ لے رہی ہے۔"نگراں ادارے نے نوٹ کیا کہ کمپنی نے کہا تھا کہ وہ مغربی کنارے کے فلسطینی علاقوں میں بھی ٹیلی کام کی خدمات فراہم کر رہی ہے لیکن اس سے یہ حقیقت کم اہم نہیں ہو جاتی کہ وہ اسرائیلی بستیوں کو بھی خدمات فراہم کر رہی ہے۔نگراں ادارہ ناروے کے مرکزی بینک کے بورڈ کو سفارشات پیش کرتا ہے جس کے پاس مالی روابط منقطع کرنے کے بارے میں حتمی فیصلہ کرنے کا اختیار ہے۔فنڈ نے اب کمپنی میں اپنے تمام حصص فروخت کر دیئے ہیں۔

کریڈٹ : انڈیپنڈنٹ نیوز پاکستان-آئی این پی