افغان دارالحکومت میں ہونے والے بم دھماکے میں مرنے والوں کی تعداد 43 ہوگئی۔غیر ملکی میڈیا کے مطابق اقوام متحدہ کے مشن برائے افغانستان نے ایک ٹویٹ میں کہاکہ جمعہ کو کابل کے تعلیمی ادارے میں خودکش دھماکے کے نتیجے میں ہلاک ہونے والوں کی تعداد 43 ہوگئی ہے جبکہ 83 افراد زخمی ہیں۔دھماکے سے متاثرہونے والوں کی بڑی تعداد لڑکیوں اور خواتین پر مشتمل ہے، حکام نے تشویشناک حالت کے باعث مزید افرادکی ہلاکت کا خدشہ ظاہر کیا ہے۔یاد رہے کہ جمعہ کے روز افغانستان کے دارالحکومت کابل میں خودکش دھماکے میں 19 افراد جاں بحق جبکہ 27زخمی ہوگئے تھے۔مرکز کے عہدیداروں کے مطابق طلبا یونیورسٹی کے پریکٹس امتحان میں بیٹھے تھے، اس علاقے میں رہنے والوں میں سے بہت سے ہزارہ اقلیت سے تعلق رکھتے ہیں، جنہیں ماضی کے حملوں میں نشانہ بنایا جا چکا ہے اور اب دوبارہ خودکش دھماکہ بھی وہیں کیا گیا۔ابھی تک کسی گروپ نے اس حملے کی ذمہ داری قبول نہیں کی ہے، لیکن داعش اس علاقے میں لڑکیوں، اسکولوں اور مساجد کو نشانہ بناتے ہوئے کئی مہلک حملے کر چکا ہے۔

کریڈٹ: انڈیپنڈنٹ نیوز پاکستان-آئی این پی