جرمن حکومت کے دفتر شماریات کے اعداد و شمار سے معلوم ہوا ہے کہ گزشتہ دو دہائیوں کے دوران الزائمر نامی بیماری سے متاثرہ مریضوں کی ہسپتالوں میں داخلے اور ہلاکتوں کی تعداد میں دو گنا سے بھی زیادہ اضافہ ہوا ہے۔ڈی سٹاٹِس کی طرف سے بتایا گیا کہ الزائمر سے متاثرہ مریضوں کے ہسپتالوں میں علاج کی ضرورت مسلسل بڑھتی جا رہی ہے۔رواں برس ورلڈ الزائمر ڈے بدھ 21 ستمبر کو منایا گیا۔ اس موقع کی مناسبت سے جاری کردہ اعداد و شمار کے مطابق سال 2020 کے دوران الزائمر سے متاثرہ مریضوں کو ہسپتالوں میں داخل کرائے جانے والے واقعات کی تعداد 19,356 رہی۔ سال 2000 میں ایسے کیسز کی تعداد 8,116 رہی تھی۔ اس طرح 2020 میں اس اضافے کی شرح 138.5 فیصد رہی۔ڈی سٹاٹس کے مطابق ان اعداد و شمار میں ایسا ممکن ہو سکتا ہے کہ کسی مریض کو کسی ایک سال میں اسی بیماری کے سبب ایک سے زائد مرتبہ ہسپتال داخل کرایا گیا ہو۔جرمن شماریاتی ادارے کے مطابق جتنے افراد کو الزائمر کے سبب ہسپتالوں میں داخل کرایا گیا، ان میں سے 41.5 فیصد مرد جبکہ 58.5 فیصد خواتین تھیں۔سال 2020 کے دوران 9,450 افراد الزائمر کے سبب موت کا شکار ہوئے۔ یہ کسی ایک سال کے دوران اس بیماری کے سبب ہونے والی اموات کی سب سے زیادہ تعداد ہے۔ سال 2000 میں ایسی اموات کی تعداد 4,535 تھی جو 2020 کے مقابلے میں نصف سے بھی کم تھی۔جرمنی میں الزائمر کے متاثرین کی سوسائٹی کے مطابق ملک میں ایسے افراد کی تعداد 1.8 ملین ہے، جن میںڈیمنشیا کی کسی نہ کسی شکل کی تشخیص ہو چکی ہے۔ ان میں قریب دو تہائی تعداد الزائمر کے مریضوں کی ہے جو اس مرض کی سب سے زیادہ عام شکل ہے۔

کریڈٹ: انڈیپنڈنٹ نیوز پاکستان-آئی این پی