روس کے صدر ولادیمیر پیوٹن نے دھمکی دی ہے کہ یوکرین کو جوہری ہتھیار دئیے گئے تو تمام تر فوجی وسائل استعمال کریں گے۔غیرملکی میڈیا کے مطابق اپنے ایک بیان میں روسی صدر نے کہا ہے کہ یوکرین کے ہر اقدام کو مانیٹر کریں گے، جارحیت کے ہر قدم کا جواب دینے کے لیے روس تیار ہے، جیسا کہ میں نے بارہا کہا ہے کہ ہمیشہ ہماری طرف سے جواب آئے گا۔جس ملک کے ساتھ ہم جنگ میں ہیں اگر وہ جوہری طاقت بن جاتا ہے تو ہم اس صورت میں اپنے تمام تر فوجی وسائل استعمال کریں گے ۔ پیوٹن کا کہنا تھا کہ اگر سرکاری طور پر کوئی کسی چیز کو منتقل کرتا ہے تو اس کا مطلب ان تمام عدم پھیلا کے وعدوں کی خلاف ورزی ہو گی جو انہوں نے کیے ہیں۔روسی صدر نے مزید کہا کہ یوکرین کے لیے جوہری ہتھیار بنانا عملی طور پر ناممکن ہے لیکن یہ ممکن ہے کہ وہ کسی قسم کا ڈرٹی بم بنا سکے جو ایک روایتی بم ہے جو تابکار مواد سے لیس ہے، اگر ایسا ہوا تو روس مناسب جواب دے گا۔اس سے قبل گزشتہ روز یوکرینی صدر زیلنسکی نے کہا تھا کہ روس نے توانائی کی تنصیبات کو کلسٹر امیونیشنز سے نشانہ بنایا ہے۔ان کا کہنا تھا کہ روس نے میزائل حملوں میں سول انفرا اسٹرکچر کو بھی نشانہ بنایا ہے، یوکرین کو مزید دفاعی نظاموں کی ضرورت ہے۔قبل ازیں روس نے 90 میزائلوں اور 100 ڈرونز سے یوکرین کے مغربی علاقوں پر حملہ کیا، یوکرینی وزیر توانائی کے مطابق روس نے ملک کی بجلی کی تنصیبات پر راکٹوں سے بڑا حملہ کیا، حملے کے بعد ملک بھر میں ایمرجنسی بنیادوں پر بجلی کی لوڈ شیڈنگ جاری ہے۔رواں ماہ روس کا یوکرین پر یہ دوسرا حملہ ہے، روس نے گزشتہ ہفتے بھی یوکرین کی بجلی تنصیبات کو نشانہ بنایا تھا جس میں 10 افراد ہلاک ہوئے تھے۔

کریڈٹ: انڈیپنڈنٹ نیوز پاکستان-آئی این پی