جنگ میں یوکرین کی مدد کرنے والے چار یورپی ممالک نے روس کا مقابلہ کرنے کے لیے مضبوط فضائی دفاعی فورس تیار کرنے کا منصوبہ بنایاہے ۔ غیر ملکی میڈیا کے مطابق روس یوکرین کی جاری جنگ میں سویڈن، ناروے، فن لینڈ اور ڈنمارک کی فضائیہ کے کمانڈروں کا کہنا ہے کہ انہوں نے روس کا مقابلہ کرنے کے لیے ایک متحد نورڈک فضائی دفاعی فورس بنانے کے منصوبے پر دستخط کیے ہیں۔ چاروں ممالک کی مسلح افواج کے بیانات کے مطابق وہ نیٹو کے تحت کام کرنے کے پہلے سے معلوم طریقوں کی بنیاد پر مشترکہ کارروائیوں کی منصوبہ بندی کرتے ہیں۔ ڈنمارک کی فضائیہ کے کمانڈر میجر جنرل جان ڈیم کا خبر رساں ادارے کو بتانا تھا کہ فضائی افواج کو ضم کرنے کا اقدام گزشتہ سال یوکرین پر روس کے حملے سے شروع ہوا تھا۔ انہوں نے کہا کہ ہمارے مشترکہ بیڑے کا موازنہ ایک بڑے یورپی ملک سے کیا جا سکتا ہے۔ اس وقت ناروے کے پاس 57 ایف16 لڑاکا طیارے اور 37 ایف35 لڑاکا طیارے ہیں ، جبکہ فن لینڈ کے پاس باسٹھ F/A-18 ہارنیٹ جیٹ اور چونسٹھ F-35s آرڈر پر ہیں ۔ ڈنمارک کے پاس اٹھاون F-16 اور ستائیس F-35s آرڈر پر ہیں اور سویڈن کے پاس 90 سے زیادہ گریپین جیٹ طیارے ہیں۔

کریڈٹ: انڈیپنڈنٹ نیوز پاکستان-آئی این پی