سائوتھ پورٹ کے ایک کیمپ میں چاقو کے حملے میں 3کمسن لڑکیوں کے قتل کیخلاف برطانیہ میں دائیں بازو کے گروہوں کی طرف سے پرتشدد ہنگامے جاری ہیں، ہوم آفس نے مساجد کیلئے ایک نئی ریپڈ رسپانس سیکیورٹی سکیم متعارف کرانے کا اعلان کردیا۔میڈیا رپورٹس کے مطابق ایک حکومتی بیان میں کہا گیا ہے کہ نئے عمل کے تحت، پولیس، مقامی حکام اور مساجد کمیونیٹیز کی حفاظت کے لیے کسی بھی سکیورٹی کا مطالبہ کرسکتے ہیں،سائوتھ پورٹ میں مسجد پر حملے کے بعد، مساجد میں سکیورٹی بڑھائی جارہی ہے، کیونکہ مغربی لندن کے مسلمانوں کو بھی دائیں بازو کی جماعتوں کی جانب سے ریلیوں سے خبردار کیا گیا تھا، پولیس کی جانب سے مسلمانوں کا تحفظ کیا جارہا ہے،ہوم آفس کی جانب سے یہ فیصلہ ملک بھر میں پرتشدد فسادات اور مسلم مخالف جذبات کی تازہ لہر کے بعد سامنے آیا ہے،ہوم سیکریٹری وویت کوپر نے حالیہ تشدد کے خلاف حکومتی موقف پر بات کرتے ہوئے کہا کہ بطور قوم ہم مجرمانہ رویے، انتہا پسندی اور نسل پرستانہ حملوں کو برداشت نہیں کریں گے، کیونکہ ہمارا ملک ان چیزوں کی مخالفت کرتا ہے،وزیر اعظم کیئر اسٹارمر نے بدامنی کو دائیں بازو کی غنڈہ گردی قرار دیتے ہوئے اس کی مذمت کرتے ہوئے کہا کہ مسلم کمیونٹیز کو بلاجواز نشانہ بنایا گیا ہے۔کیتھولک، مسلم، یہودی، سکھ، اور ہندو کمیونٹیز کی نمائندگی کرنے والے مذہبی رہنمائوں نے سائوتھ پورٹ سانحے کی مذمت کرتے ہوئے ایک مشترکہ بیان جاری کیا،بیان میں کہا گیا کہ تقسیم ان رشتوں اور ماحول کو تباہ کر سکتی ہے جس پر ہم اپنی زندگی کے ہر دن کا انحصار کرتے ہیں اور ہماری کمیونٹیز میں نفرت کے لیے کوئی جگہ نہیں ہے،یاد رہے کہ برطانوی حکام کو تارکین وطن اور مسلمانوں کے خلاف سوشل میڈیا پر غلط معلومات کی وجہ سے انگلینڈ میں 13سالوں میں ہونے والے بدترین فسادات کو ختم کرنے کے لیے دبا کا سامنا ہے۔

کریڈٹ: انڈیپنڈنٹ نیوز پاکستان-آئی این پی