بھارتی ریاست راجستھان کے شہر پرتاب گڑھ میں ایک حاملہ خاتون کو شوہر نے برہنہ کر کے پریڈ کرائی، پولیس نے انکشاف کیا ہے کہ واقعے میں سسرال والے بھی ملوث تھے، جس پر 8افراد کو گرفتار کر لیا گیا ہے،بھارتی میڈیا رپورٹس کے مطابق راجستھان کے شہر پرتاپ گڑھ میں 31اگست کو خاندانی جھگڑے کے باعث سسرال والوں نے 21سالہ حاملہ خاتون کو برہنہ کر کے راستے میں پریڈ کرائی جس کی دل دہلا دینے والی ویڈیو وائرل ہو گئی ہے،واقعے پر وزیر اعلی اشوک گہلوت نے پولیس حکام کو سخت کارروائی کی ہدایت کی جس کے بعد پولیس نے 8افراد کو گرفتار کر لیا ہے، جب کہ واقعے میں ملوث شوہر کو پہلے ہی گرفتار کیا جا چکا ہے۔ یہ افسوس ناک واقعہ دریاواڑ تھانے کی حدود میں گائوں نچل کوٹا میں پیش آیا، متاثرہ خاتون اور ملزم دونوں کا تعلق قبائلی برادری سے ہے، پولیس کے مطابق ایف آئی آر درج کر لی گئی ہے،ریاستی حکومت اس کیس کو سنجیدگی سے لے رہی ہے، وزیر اعلی گہلوت کے مطابق ملزمان کے خلاف مقدمہ فاسٹ ٹریک کورٹ میں چلایا جائے گا۔ بھارت کی مختلف ریاستوں میں آئے دن خواتین کے ساتھ انسانیت سوز سلوک کے اسی طرح کے واقعات رونما ہو رہے ہیں، پرتاپ گڑھ کے اس واقعے پر وومین کمیشن نے بھی سخت نوٹس لیا ہے۔

کریڈٹ: انڈیپنڈنٹ نیوز پاکستان-آئی این پی