بھارت نے امریکا کے حریف روس سے تیل خریدنے پر اپنا واضح موقف دنیا کے سامنے رکھ دیا۔غیر ملکی میڈیا کے مطابق وزیر پیٹرولیم اور قدرتی گیس ہردیپ سنگھ پوری نے اپنے بیان میں کہا کہ حکومت کا اخلاقی فرض ہے کہ اپنے عوام کو سستی توانائی فراہم کرے۔ہردیپ سنگھ نے کہا کہ بھارت کو جہاں سے تیل ملے گا وہ خریدنا جاری رکھے گا۔ کسی نے بھارت کو روس سے تیل نہ خریدنے کا دبائو نہیں ڈالا۔واضح رہے کہ گزشتہ ماہ امریکا اور بھارت میں روسی تیل کی قیمت کی حد مقرر کرنے کے معاملے پر اختلاف سامنے آیا تھا۔امریکی وزیر خارجہ اینٹونی بلنکن اور بھارت کے خارجی امور کے وزیر سبرامنیم جے شنکر کے مابین واشنگٹن میں ملاقات ہوئی تھی۔ملاقات میں اینٹونی بلنکن نے دونوں ممالک کی شراکت داری کو دنیا کی اہم شراکت داری قرار دیا تھا۔ اس پر سبرامنیم جے شنکر نے کہا تھا کہ خطوں میں بھارت امریکا تعاون کے اثرات آج نمایاں نظر آ رہے ہیں۔بھارتی وزیر نے کہا تھا: دونوں ممالک نے روسی تیل کی قیمت کی حد مقرر کرنے کی تجویز پر تبادلہ خیال کیا مگر فی الوقت ہماری تشویش دبائی تلے آئی توانائی مارکیٹوں میں قیمتوں میں اضافہ روکنا ہے۔

کریڈٹ: انڈیپنڈنٹ نیوز پاکستان-آئی این پی