بھارت کے پاکستان میں ہونے والی دہشتگردی میں ملوث ہونے کے مزید شواہد سامنے آگئے،ذرائع کے مطابق بھارت کی خفیہ ایجنسی را نے پاکستان میں دہشتگردی میں ملوث ہونے کا اعتراف سوشل میڈیا پر کرلیا، پاکستان میں دہشتگرد واقعات کی خبریں سب سے پہلے بھارتی سوشل میڈیا اکائونٹس پر نشر کی جاتی ہیں، دہشتگرد واقعات کی خبریں نشر کرنے میں ایکس (سابق ٹوئٹر)پر را سے متعلق اکائونٹس سر فہرست ہیں،ذرائع کا مزید کہنا ہے کہ حیران کن طور پر ان اکائونٹس پر دہشتگردی واقعات کی پہلے سے وارننگ دے دی جاتی ہے، میانوالی ائیربیس حملے کی اطلاع بھی ایک رات پہلے ہی را کے اکائونٹ نے دے دی تھی، حملے اور کلیئرنس آپریشن کے دوران یہ اکائونٹس ایسی وڈیوز نشر کرتے رہے جو دہشتگردوں کے موبائل سے بنائی گئی تھیں، اِن اکائونٹس کو معلومات بدنام زمانہ بھارتی ایجنسی'' را ''پہنچاتی ہے،یہ پروپیگنڈا اکائونٹس پاکستان میں دہشتگرد حملوں کے واقعات کو بڑھا چڑھا کر بھی پیش کرتے ہیں، را کے یہ اکائونٹس ایک ہی جگہ اور ایک ہی آئی پی ایڈریس سے چلائے جارہے ہیں، اکتوبر 26کو وادی نیلم سے 5شہریوں کے اغوا کو آپریشن کا رنگ دے کر انہی اکائونٹس سے نشر کیا گیا،ذرائع کے مطابق 28اکتوبر کو وادی تیراہ میں ہونے والے دہشتگرد حملے کی اطلاع بھی انہیں را کے اکائونٹس سے دی گئی تھی جبکہ 4اکتوبرکو ان اکائونٹس سے ایشیا کے دو ممالک میں جنگ بندی کی پیش گوئی بھی کی گئی ہے،را کے اکائونٹ سے 5نومبر کو دعوی کیا گیا تھا کہ پاک فوج نے کشمیر میں شہری آبادی کو نشانہ بنانے کا فیصلہ کیا اور 26اکتوبر کو ظفر وال سیکٹر میں سیز فائر کی خلاف ورزی کی وارننگ پہلے ہی ان بدنام زمانہ اکائونٹس سے دی جا چکی تھی،ذرائع کا کہنا ہے کہ 21اکتوبر کو 2ہزار پاکستانی فوجی غزہ پہنچنے کا دعوی کیا گیا اور 13ستمبرکو اننت ناگ میں ہوئے حملے کا ملبہ بھی ان اکائونٹس سے پاکستان پر ڈالا گیا، ان پروپیگنڈا اکائونٹس نے 6ستمبر کو طور خم بارڈر پرہونے والی فائرنگ کو جنگ بنا کر پیش کیا۔

کریڈٹ: انڈیپنڈنٹ نیوز پاکستان-آئی این پی