بھارتی شہر ممبئی کے کرلا میں ایک بس پیدل چلنے والوں اور گاڑیوں پر چڑھ دوڑی، جس کے نتیجے میں کم از کم چھ افراد ہلاک اور 49 دیگر زخمی ہو گئے۔ پولیس نے بس ڈرائیور کو گرفتار کر لیا ۔بھارتی میڈیا رپورٹس کے مطابق یہ واقعہ گزشتہ رات اس وقت پیش آیا، جب برہان ممبئی الیکٹرسٹی سپلائی اینڈ ٹرانسپورٹ انڈرٹیکنگ کی بس (روٹ نمبر332 ) کا ڈرائیور کنٹرول کھو بیٹھا اور کئی گاڑیوں اور پیدل چلنے والوں پر چڑھ گیا، جس کے بعد بس ایک ہاسنگ سوسائٹی کی دیوار سے ٹکرا کر رک گئی۔ مرنے والوں کی شناخت کنیز فاطمہ انصاری، شیوم کشیپ، آفرین عبدالسلام شاہ اور انعم شیخ کے طور پر ہوئی ہے۔حادثے کے بعد مقامی لوگوں نے زخمیوں کو قریبی بھابھا اسپتال پہنچایا۔ کچھ دیر بعد پولیس اور فائر بریگیڈ کی ٹیموں سمیت ہنگامی خدمات پہنچ گئیں۔حادثے میں 45 سے زیادہ لوگ زخمی ہوئے جن میں سے کچھ اب بھی ہسپتال اور دیگر طبی مراکز میں زیر علاج ہیں۔جائے وقوعہ سے ملنے والی سی سی ٹی وی فوٹیج میں بس کو تیز رفتاری سے دوڑتے اور لوگوں کو خطرے سے بچنے کے لیے بھاگتے ہوئے دکھایا گیا ہے۔

کریڈٹ : انڈیپنڈنٹ نیوز پاکستان-آئی این پی