امریکی صدر جوبائیڈن آئندہ ہفتے جدہ میں سعودی فرماں روا اور ولی عہد محمد بن سلمان سے ملاقات کریں گے۔غیر ملکی خبر رساں ادارے "رائٹرز "کے مطابق وائٹ ہاؤس کی جانب سے جاری بیان میں کہا گیا ہیکہ صدر جوبائیڈن آئندہ دنوں میں دورہ جدہ کے دوران سعودی فرماں روا شاہ سلمان بن عبدالعزیز اور ولی عہد محمد بن سلمان سے ملاقات کریں گے ،امریکی صدر کا یہ حساس دورہ سعودی عرب محمد بن سلمان کے ساتھ خراب تعلقات کو دوبارہ ترتیب دینے کی کوشش ہو گا۔رپورٹ کے مطابق جو بائیڈن کو اس وقت ملک میں تیل کی قیمتوں کو کم کرنے کیلئے سعودی حکومت کی مدد کی ضرورت ہے اس لیے وہ سعودی حکومت کی یمن جنگ کیلئے کوششوں کی حوصلہ افزائی کر رہے ہیں جبکہ امریکہ خطے میں ایران کے اثرو رسوخ اور چین کے عالمی اثرات کو بھی روکنا چاہتا ہے۔غیر ملکی میڈیا کے مطابق تاحال یہ واضح نہیں ہوا کہ امریکی صدر براہ راست ولی عہد شہزادہ محمد بن سلما ن کیساتھ بات چیت کریں گے یا نہیں کیونکہ سعودی صحافی جمال خاشقجی کے قتل کو لیکر جوبائیڈن اور سعودی ولی عہد کے درمیان کافی کشیدگی چل رہی تھی۔ترجمان وائٹ ہاؤس کے مطابق صدر جوبائیڈن آئندہ ہفتے اپنے پہلے دورہ مشرق وسطیٰ پر روانہ ہوں گے جس کے بعد وہ 15 اور 16 جولائی کو شاہ سلمان کی دعوت پر جی سی سی سمٹ میں شرکت کریں گے جب کہ اس سمٹ میں عراق، مصر اور اردن بھی شامل ہوں گے،اس کے علاوہ امریکی صدر دورہ سعودی عرب سے پہلے اسرائیل اور مغربی کنارے پر بھی قیام کریں گے۔

کریڈٹ:
انڈیپنڈنٹ نیوز پاکستان-آئی این پی