ایران کے سرکاری ٹی وی نے دعویٰ کرتے ہوئے کہا ہے کہ اس نے بحر ہند میں پہلا ڈرون بحری ڈویژن تعینات کردیا ہے۔برطانوی خبر رساں ادارے روائٹرز نے ایران کے سرکاری ٹی وی کے حوالے سے بتایا ہے کہ جمعہ 15 جولائی کو ایران کی جانب سے بحیرہ ہند میں پہلے بحری ڈرون ڈویژن کے قیام کا اعلان کیا گیا۔یہ اعلان ایسے موقع پر کیا گیا جب امریکی صدر جو بائیڈن ایرانی خطرے کے خلاف عرب ممالک کی حمایت جمع کرنے کے لئے مشرق وسطیٰ کے دورے پر ہیں۔
ٹی وی کی رپورٹ میں صرف یہ بتایا گیا ہے کہ بحری جہاز پچاس ڈرونز لے جا سکے گا، تاہم مزید تفصیلات نہیں بتائی گئیں کہ ڈویڑن میں کتنے جہاز، آبدوزیں یا ڈرونز ہونگے۔ ایرانی ٹی وی نے بتایا کہ جن ڈرونز کی جمعے کے روز نمائش کی گئی ان میں پیلیکان، عرش، ہما، چام روش، جو بن، ابدالی4 اور باورـ5شا مل ہیں۔قبل ازیں امریکا کے قومی سلامتی کے مشیر جیک سلیوان نے کہا تھا کہ واشنگٹن یہ واضح کرنا چاہتا ہے کہ ایران روس کو کئی سو ڈرونز فراہم کرنے کی تیاری کر رہا ہے، جس میں سے کچھ ایسے بھی ہیں جو ہتھیار لے جا سکتے ہیں اور ایران روسی فوجوں کو ان کے استعمال کی تربیت دینے کی تیاری بھی کر رہا ہے۔
امریکی مشیر کا بیان منظر عام پر آنے کے بعد ایران کے سرکاری میڈیا گزشتہ روز ایرانی وزیر خارجہ حسین امیرعبدالل?یان کی یوکرین ہم منصب کے ساتھ ٹیلیفون کال میں امریکی قومی سلامتی کے مشیر کے بیان کی تردید کی تھی۔دوسری جانب مشرق وسطیٰ کے دورے پر موجود امریکی صدر نے جمعرات کے روز امریکی صدر بائیڈن اور اسرائیلی وزیر اعظم لیپڈ نے یروشلم میں اس مشترکا عزم پر دستخط کئے کہ ایران کو جوہری ہتھیار حاصل نہیں کرنے دئیے جائیں گے۔جب کہ ایران اس بات کی تردید کرتا ہے کہ وہ جوہری ہتھیاروں کے حصول کے لئے کوشاں ہے۔ ایران کا کہنا ہے کہ اس کا جوہری پروگرام صرف پر امن مقاصد کیلئے ہے۔

کریڈٹ:
انڈیپنڈنٹ نیوز پاکستان-آئی این پی