سعودی عرب میں حرمین شریفین انتظامیہ کے سربراہ اعلٰی شیخ ڈاکٹرعبدالرحمان السدیس نے مسجد الحرام میں مطاف کے توسیعی منصوبے والی عمارت کو (الرواق السعودی) ’سعودی دالان‘ کا نام دیا ہے۔

سرکاری خبررساں ادارے ایس پی اے کے مطابق ڈاکٹرعبدالرحمان السدیس نے کہا کہ ’سعودی دالان میں العباسی دالان کے عقب والی مطاف کی نئی عمارت شامل ہے۔ سعودی دالان خانہ کعبہ کے صحن کے اطراف واقع ہے۔‘ 

انہوں نے اس کا پس منظر بیان کرتے ہوئے کہا کہ بانی مملکت شاہ عبدالعزیز نے زائرین کی بڑھتی ہوئی تعداد کے پیش نظر مسجد الحرام میں توسیع کا حکم دیا تھا

’شاہی فیصلے پر عمل درآمد 1955 میں شاہ سعود کے دور میں شروع ہوا تھا۔ شاہ سعود، شاہ فیصل اور شاہ خالد کے عہد میں ہوتا رہا۔ شاہ فہد اور شاہ عبداللہ کے ادوار میں بھی اس کی تکمیل کی جاتی رہی۔‘  

انہو ں نے کہا کہ ’شاہ سلمان بن عبدالعزیز کے عہد تک توسیع کا کام جاری رہا۔‘ 

حرمین شریفین انتظامیہ کے سربراہ اعلٰی نے بتایا کہ ’سعودی دالان عباسی دالان کا احاطہ کیے ہوئے ہے اور اس کی تکمیل ہے۔ اس کی انفرادی خصوصیت یہ ہے کہ وسیع و عریض رقبہ اتنا زیادہ  ہے کہ جس کی مثال مسجد الحرام کی تاریخ میں اس سے قبل کبھی نہیں ملتی۔ یہ چار منزلوں پر مشتمل ہے۔ زمینی، پہلی اور دوسری منزل، چھت سمیت چار منزلیں بنتی ہیں۔‘ 

’الرواق السعودی میں دو لاکھ 87 ہزار نمازیوں کی گنجائش ہے۔ ایک لاکھ سات ہزار افراد الرواق السعودی اور مطاف میں ایک گھنٹے میں طواف کر سکتے ہیں۔‘ 

ڈاکٹرعبدالرحمان السدیس نے کہا کہ ’الرواق السعودی میں طواف کرنے والوں اور نمازیوں کے لیے زیادہ گنجائش ہے۔ یہ جملہ سہولتوں سے آراستہ ہے۔ جدید ٹیکنالوجی اور خدمات کے ساتھ روشنی اور ساؤنڈ سسٹم موجود ہے اور یہ تمام سہولتوں کے باعث زائرین کو مکمل روحانی ماحول فراہم کر رہا ہے۔‘

کریڈٹ: انڈیپنڈنٹ نیوز پاکستان-آئی این پی