بلوچستان کے ضلع ژوب اور جنوبی وزیرستان وانا میں زلزلے کے جھٹکے محسوس کیے گئے۔ زلزلہ پیما مرکز کے مطابق ژوب میں ایک کے بعد ایک دو جھٹکے محسوس کئے گئے ۔ریکٹر اسکیل پر زلزلے کی شدت 4.0 ریکارڈ کی گئی۔ زلزلے کی زیر زمین گہرائی 33 کلومیٹر تھی۔ جب کہ مرکز ژوب سے 61 کلومیٹر شمال مغرب کی جانب تھا۔نیشنل سیسمک مانیٹرنگ سینٹر اسلام آباد کے مطابق پیر کی صبح پہلا زلزلہ ریکٹر اسکیل پر 5 کی شدت سے ریکارڈ کیا گیا اور اس کا مرکز زمین سے 35 کلومیٹر کی گہرائی میں تھا۔ زلزلے کا مرکز ژوب سے 106 کلومیٹر جنوب میں تھا۔جنوبی وزیر ستان کے علاقے وانا میں زلزلہ محسوس کیا گیا ۔امریکی جیولوجیکل سروے کے مطابق زلزلے کا مرکز ضلع کوہلو سے 61 کلومیٹر شمال میں صرف 10 کلومیٹر کی گہرائی میں تھا۔اس کے ایک گھنٹے سے بھی کم وقت میں ریکٹر اسکیل پر 3.9 شدت کا دوسرا زلزلہ ریکارڈ کیا گیا، جس کا مرکز ژوب سے 79 کلومیٹر جنوب میں 151 کلومیٹر گہرائی میں تھا۔زلزلے کے جھٹکوں سے مقامی آبادی میں خوف وہراس پھیل گیا تاہم فوری طور پر کسی جانی یا مالی نقصان کی اطلاع موصول نہیں ہوئی ۔حکام کا کہنا ہے کہ صورتحال پر گہری نظر رکھے ہوئے ہیں اور رہائشیوں کو کسی بھی آفٹر شاکس کے لئے چوکس رہنے کا مشورہ دیا گیا ہے ۔

کریڈٹ : انڈیپنڈنٹ نیوز پاکستان-آئی این پی