سوار محمد حسین شہید نشان حیدر کا 53 واں یوم شہادت عقیدت واحترام سے منایاگیا۔صدر مملکت آصف علی زرداری ، وزیراعظم شہبازشریف ،چیئرمین جوائنٹ چیفس آف سٹاف کمیٹی، سروسز چیفس اور مسلح افواج نے شہید کو بھرپور خراج عقیدت پیش کیا ہے ۔سوارمحمد حسین شہید پنجاب کے علاقے گوجر خان کے قریب ڈھوک پیر بخش میں 18 جون 1949 کو پیدا ہوئے، 10دسمبر 1971 کو جام شہادت نوش کیا، جس وقت سوار محمد حسین کی شہادت ہوئی ان کی عمر محض 22 سال اور 6 ماہ تھی۔دریں اثناء اپنے پیغام میں صدر مملکت آصف علی زرداری کا کہنا تھاکہ سوار محمد شہید نے بہادری کی لازوال مثال قائم کی، انہوں نے وطن عزیز پر اپنی جان نچھاور کر دی۔وزیر اعظم شہباز شریف نے کہا کہ سوار محمد حسین شہید نشان حیدر نے 1971 کی جنگ میں بے مثال بہادری اور جرآت کا مظاہرہ کیا، دشمن کی نشاندہی کرتے ہوئے ٹینک شکن توپوں سے دشمن کے 16 ٹینک تباہ کرنے میں کلیدی کردار ادا کیا۔ان کا کہنا تھا کہ محمد حسین شہید نشان حیدر نے جرآت و بہادری کی مثال قائم کرتے ہوئے وطن عزیز کی خاطر اپنی جان نچھاور کر دی

سوار محمد حسین شہید کا وطن کی حفاظت کیلئے غیر متزلزل عزم اور عہد وفا نبھاتے ہوئے جام شہادت نوش کرنے کا عمل آئندہ نسلوں کیلئے قابل تقلید مثال ہے۔شہباز شریف نے کہا کہ مجھ سمیت پوری قوم کو اپنے شہدا اور ان کے اہل خانہ پر فخر ہے، پاکستانی قوم وطن عزیز کی بقا کیلئے اپنی جانوں کا نذرانہ پیش کرنے والے عظیم شہدا کی قربانیوں کو کبھی فراموش نہیں کرے گی۔ علاوہ ازیں چیئرمین جوائنٹ چیفس آف سٹاف کمیٹی، سروسز چیفس اور مسلح افواج نے سوار محمد حسین شہید نشان حیدر کو بھرپور خراج عقیدت پیش کیا ہے۔پاک فوج کے شعبہ تعلقات عامہ(آئی ایس پی آر) کے مطابق سوار محمد حسین نے 1971 کی جنگ میں بے مثال بہادری کا مظاہرہ کیا، سوار محمد حسین نے ظفروال شکر گڑھ سیکٹر میں دشمن کے 16 ٹینک تباہ کئے۔آئی ایس پی آر نے کہا کہ پوری قوم دفاع وطن کیلئے جانیں قربان کرنے والے بہادر سپوتوں کو سلام پیش کرتی ہے۔

کریڈٹ : انڈیپنڈنٹ نیوز پاکستان-آئی این پی