سندھ حکومت نے کم آمدنی والے گھرانوں کو سستی اور قابل تجدید توانائی فراہم کرنے کے لیے مفت سولر پینل اسکیم کا آغاز کر دیا ہے۔ اس اسکیم کے تحت مستحق خاندانوں کو مفت سولر پینلز فراہم کیے جائیں گے، تاکہ وہ متبادل توانائی کے ذریعے بجلی کی ضروریات پوری کر سکیں۔ جاری اعلامیہ کے مطابق مفت سولر پینل حاصل کرنے کے لیے درخواست کا طریقہ کار نہایت آسان رکھا گیا ہے ۔ خواہشمند افراد سرکاری ویب سائٹ پر آن لائن درخواست دے سکتے ہیں یا قریبی مقامی حکومتی دفتر میں جا کر فارم جمع کرا سکتے ہیں۔ درخواست فارم میں بنیادی معلومات، بشمول فیملی کی آمدنی اور پتہ درج کرنا ہوگا۔درخواست جمع کرانے کے بعد حکومت کی جانب سے جانچ کی جائے گی، اور اہل افراد کی تصدیق کے بعد ان کے گھروں پر سولر پینلز بالکل مفت نصب کر دئیے جائیں گے۔ اس اسکیم میں درخواست دینے کے لیے جو دستاویزات درکار ہوں گی ان میں قومی شناختی کارڈ ،آمدنی کا ثبوت،پتہ کا ثبوت (یوٹیلیٹی بل یا مقامی حکومت کا تصدیقی لیٹر)،گھر کے دیگر افراد کے شناختی کارڈ( اگر قابل اطلاق ہو)۔علاورہ ازیں درخواست کی منظوری یا مسترد ہونے کی تصدیق کے لیے سندھ حکومت نے ایک آسان نظام متعارف کرایا ہے۔ جس کے تحت آن لائن پورٹل پر سی ایم سولر اسکیم پورٹل یا ایم سی ایس ایپ پر لاگ ان کریں اور ایپلیکیشن اسٹیٹس سیکشن میں جا کر اپنی درخواست کی موجودہ حیثیت دیکھیں۔ حکومت کی جانب سے درخواست گزاروں کو ان کی درخواست کی حیثیت سے متعلق باقاعدہ ایس ایم ایس موصول ہوگا۔ہیلپ لائن سپورٹ: شناختی کارڈ نمبر یا ریفرنس نمبر فراہم کر کے ہیلپ لائن سے اپنی درخواست کی تفصیلات معلوم کی جا سکتی ہیں۔

کریڈٹ: انڈیپنڈنٹ نیوز پاکستان-آئی این پی