سینئر وکیل لطیف آفریدی کے قتل کے خلاف وکلا اور بار کونسلز کی اپیل پر عدالتوں میں ہڑتال جاری ۔ پنجاب بار، لاہور ہائیکورٹ بار، لاہور بار، پاکستان بار کونسل، اسلام آباد بار کونسل اور پختونخوا بار کونسل کی اپیل پر وکلا عدالتوں میں پیش نا ہو ئے ، جس کے باعث کئی مقدمات کی سماعت نہیں ہو ئی ۔ وکلا تنطیموں کی جانب سے سپریم کورٹ بار کے سابق صدر کے قتل کی سخت الفاظ میں مذمت کرتے ہوئے کہا گیا کہ آئے روز وکلا کو عدالتوں کے اندر نشانہ بنایا جا رہا ہے۔ وکلا کو سکیورٹی کے ساتھ ایسے واقعات روکنے کے لیے ٹھوس اقدامات کیے جائیں۔ اسلام آباد ہائی کورٹ میں بھی سینئر قانون دان عبداللطیف آفریدی کے پشاور میں قتل کے خلاف وکلا کی جزوی ہڑتال جاری ہے، اس دوران وکلا صرف ارجنٹ یا ہنگامی نوعیت کے کیسز میں پیش ہو رہے ہیں۔ ادھر پشاور میں بھی وکلا آج عدالتی کارروائیوں کا بائیکاٹ کرتے ہوئے مقدمات کی سماعت میں پیش نہیں ہو رہے۔ خیبر پختونخوا بار کونسل اور پشاور ہائی کورٹ بار نے آج ہڑتا کے علاوہ تین روزہ سوگ کا اعلان بھی کر رکھا ہے۔ واضح رہے کہ گزشتہ روز سینئر قانون دان اور سابق صدر سپریم کورٹ بار عبداللطیف آفریدی کو فائرنگ کرکے قتل کردیا گیا تھاجب کہ پولیس نے واقعے کے بعد فائرنگ کرنے والے ملزم کو گرفتار کرلیا تھا۔

کریڈٹ: انڈیپنڈنٹ نیوز پاکستان-آئی این پی