کراچی کے شہری سے 50 لاکھ روپے لوٹنے والے اسٹریٹ کرمنل کا ساتھی بینک کا سیکیورٹی گارڈ نکلا۔ رواں برس 16 نومبر کو کراچی کے علاقے پی ای سی ایچ ایس میں بینک سے ایک شہری پچاس لاکھ روپے لے کر نکلا تو نامعلوم ملزمان نے اسے لوٹ لیا۔ پولیس حکام نے بتایا کہ شہری سے لوٹ مار کرنے والوں میں بینک کا سیکیورٹی سپر وائزر بھی شامل تھا، جسے پولیس نے گرفتار کر لیا ہے۔ ایس ایس پی ایسٹ عبدالرحیم شیرازی کے مطابق سیکیورٹی سپروائزر خاور خان نے اپنے ساتھی ملزمان کو شہری کے پاس بڑی رقم ہونے کی اطلاع دی، ملزم کی نشاندہی پر دو موٹر سائیکل پر سوار ملزم شاکر عرف شاہد اور دو ساتھیوں نے بینک سے تعاقب کرکے واردات کی تھی۔

ایس ایس پی کے مطابق نجی کمپنی کے مالک امتیاز احمد نے 16 نومبر کو نجی بینک کی ایف ٹی سی برانچ سے رقم نکلوائی تھی، گرفتار ملزم خاور خان اسی بینک کا سکیورٹی سپروائزر ہے جہاں سے رقم نکلوائی گئی تھی۔ 3 ملزمان نے پی ای سی ایچ سوسائٹی بلاک 6 میں نجی کمپنی کے دفتر کے گیرج میں امتیاز احمد سے 50 لاکھ روپے لوٹے اور فرار ہوگئے۔ پولیس کے مطابق ملزم خاور خان پہلے بھی گرفتار ہو چکا ہے، اور جیل میں اس کی ملزم شاکر سے ملاقات ہوئی تھی، ملزم شاکر عرف شاہد لانڈھی کی سیاسی جماعت سے تعلق رکھتا ہے۔ ایس ایس پی کے مطابق ملزم خاور نے اپنے بیان میں اعتراف جرم کرتے ہوئے بتایا کہ واردات سے ایک دن قبل ملزم شاکر عرف شاہد اپنے ساتھیوں کے ہمراہ ایف ٹی سی آیا تھا، اور اس نے بڑی رقم کی اطلاع دینے کی صورت میں اچھی رقم دینے کی آفر دی تھی۔ ملزم نے اپنے بیان میں بتایا کہ ملزم شاکر نے 50 لاکھ روپے کی ڈکیتی کرنے کے بعد فون پر صرف 20 لاکھ روپے ہاتھ لگنے کا بتایا، میں نے اس سے اپنے حصے کی رقم بعد مانگی تو اس نے موبائل فون بند کر دیا، اور لوٹی گئی رقم سے حصہ نہیں دیا۔

کریڈٹ: انڈیپنڈنٹ نیوز پاکستان-آئی این پی