سابق صدر آصف علی زرداری پر قتل کی سازش کے الزام کیس میں سربراہ عوامی مسلم لیگ شیخ رشید پر فرد جرم عائد کئے جانے کی کارروائی ایک بار پھر موخر کردی گئی۔ ڈسٹرکٹ اینڈ سیشن کورٹ اسلام آباد میں جوڈیشل مجسٹریٹ عباس شاہ نے شیخ رشید کیخلاف کیس کی سماعت کی۔ معاملہ اسلام آباد ہائیکورٹ میں زیرالتوا ہونے کے باعث کیس کی مزید سماعت 3 جون تک ملتوی کردی گئی۔ خیال رہے کہ پیپلز پارٹی کے ایک مقامی رہنما نے شیخ رشید کے خلاف سابق صدر آصف علی زرداری پر عمران خان کے قتل کی سازش کا الزام لگانے پر شکایت درج کرائی تھی۔ شکایت گزار کی مدعیت میں تھانہ آبپارہ پولیس نے آصف زرداری پر عمران خان کو قتل کرنے کی سازش سے متعلق بیان پر مقدمہ درج کیا تھا، جس میں پاکستان پینل کوڈ کی دفعات 120-بی، 153 اے اور 505 شامل کی گئی تھیں۔

کریڈٹ: انڈیپنڈنٹ نیوز پاکستان-آئی این پی