وفاقی تحقیقاتی ادارے(ایف آئی اے)کے سائبر کرائم سرکل راولپنڈی نے کارروائی کرتے ہوئے سوشل میڈیا کے ذریعے خاتون شہری کو مبینہ طور پر ہراساں اور بلیک میل کرنے والے ملزم کو گرفتار کرلیا۔ترجمان ایف آئی اے کے مطابق ملزم محمد سعید کو چھاپہ مار کارروائی میں کلر سیداں راولپنڈی سے گرفتار کیا گیا۔ ملزم نے خاتون شہری کی نازیبا ویڈیوز اور تصاویر بنائیں، ملزم مذکورہ تصاویر اور ویڈیوز کی بنیاد پر متاثرہ خاتون کو بلیک میل کرنے میں ملوث پایا گیا۔ایف آئی اے نے کہا کہ ملزم کو جدید ٹیکنالوجی کو بروئے کار لاتے ہوئے گرفتار کیا گیا، ملزم کے قبضے سے موبائل فون ضبط کر لیا گیا۔ ترجمان نے بتایا کہ ضبط شدہ فون سے مذکورہ سوشل میڈیا اکائونٹس اور دیگر شواہد بھی برآمد کر لیے گئے، ملزم متاثرہ خاتون کی قابلِ اعتراض تصاویر اور ویڈیوز شئیر کرنے میں بھی ملوث پایا گیا۔ایف آئی اے کے مطابق ملزم کو گرفتار کر کے تفتیش کا آغاز کر دیا گیا ہے جس کے بعد مزید قانونی کارروائی کی جائے گی۔

کریڈٹ : انڈیپنڈنٹ نیوز پاکستان-آئی این پی