پنجاب بھر کے سرکاری اسپتالوں کی نجکاری کے خلاف ینگ ڈاکٹرز کی جانب سے احتجاج جاری ہے، جس کے باعث پیر کو تیسرے روز بھی او پی ڈیز بندر ہیں، ہڑتال کے سبب اسپتالوں میں آنے والے مریضوں کو شدید مشکلات کا سامنا ہے۔ینگ ڈاکٹرز ایسوسی ایشن(وائی ڈی اے) نے حکومت کی جانب سے سرکاری اسپتالوں کی ممکنہ نجکاری کے فیصلے کو مسترد کرتے ہوئے او پی ڈیز میں کام بند کر رکھا ہے۔لاہور کے بڑے سرکاری اسپتالوں، جن میں سروسز اسپتال، پنجاب انسٹی ٹیوٹ آف کارڈیالوجی(پی آئی سی) ، جناح اسپتال، جنرل اسپتال اور چلڈرن اسپتال شامل ہیں، میں معمول کی طبی سہولیات معطل ہیں۔ او پی ڈیز بند ہونے کے باعث دور دراز سے آنے والے مریض، خصوصا بزرگ، خواتین اور بچوں کو شدید پریشانی کا سامنا کرنا پڑ رہا ہے۔ اسپتالوں میں صرف ایمرجنسی وارڈز میں محدود پیمانے پر طبی سہولیات دی جا رہی ہیں۔ینگ ڈاکٹرز کا موقف ہے کہ سرکاری اسپتالوں کی نجکاری کا مطلب عام عوام کو مہنگے علاج کی طرف دھکیلنا ہے، جو کسی صورت قبول نہیں کیا جائے گا۔ انہوں نے حکومت سے مطالبہ کیا ہے کہ نجکاری کا فیصلہ واپس لے کر عوامی مفاد میں صحت کی سہولیات کو بہتر بنانے کے لیے اقدامات کیے جائیں۔ حکومت کی جانب سے ہڑتالی ڈاکٹروں سے مذاکرات کی کوئی واضح پیش رفت تاحال سامنے نہیں آئی ہے۔

کریڈٹ: انڈیپنڈنٹ نیوز پاکستان-آئی این پی