امریکی محکمہ خارجہ کے ترجمان میتھیو ملر نے پاکستان میں صوبائی وزرا اور مشیروں کی تنخواہوں میں بڑے پیمانے پر اضافے کے حوالے سے کہا ہے کہ مجھے معلوم ہے کہ یہ سوال کہیں نہ کہیں ہے، میرے خیال میں تنخواہوں میں اضافے کا سوال پاکستان کے عوام اور وہاں حکومت کا معاملہ ہے امریکا کا مسئلہ نہیں۔ امریکی محکمہ خارجہ کے ترجمان کی پریس بریفنگ میں ایک صحافی نے پوچھا کہ پاکستان میں وزرا کی تنخواہوں میں 900 فیصد تک اضافہ ہوا ہے۔ صحافی نے سوال کیا ابھی ایک ماہ قبل ہی میں نے واشنگٹن ڈی سی میں پاکستانی وزیر خزانہ سے پوچھا تھا کہ ایک ایسے ملک میں یہ اضافہ بالکل ناقابل قبول ہے جہاں کے حالات بہتر نہ ہوں اور غرب ہو اور پھر آپ یہاں فنڈز یا قرضے مانگنے آتے ہیں۔جس پر امریکی وزارت خارجہ کے ترجمان میتھیو ملر نے مبہم انداز میں کہا کہ مجھے معلوم ہے کہ یہ سوال کہیں نہ کہیں ہے۔ مجھے امید ہے کہ ہم جلدی اس تک پہنچیں گے۔صحافی نے پھر سے پوچھا کہ اس بارے میں آپ کا کیا تبصرہ ہے جس پر میتھیو ملر نے سوال کیا کہ کس پر؟ تنخواہوں میں اضافے کے معاملے پر؟ صحافی نے اپنے سوال کی وضاحت کرتے ہوئے کہا کہ امریکا نے مشکل وقت پاکستان کا ساتھ دیا لیکن وہاں کے حکمرانوں نے اپنی تنخواہوں میں 900 فیصد اضافہ کرلیا۔ ترجمان میتھیوملر نے جواب دیا کہ میرے خیال میں تنخواہوں میں اضافے کا سوال پاکستان کے عوام اور وہاں حکومت کا معاملہ ہے امریکا کا مسئلہ نہیں۔ میتھیو ملر کا مزید کہنا تھا کہ ہم دنیا بھر میں کسی بھی ملک کے حکومتی ملازمین کی تنخواہوں پر اپنی رائے نہیں دیتے۔

کریڈٹ : انڈیپنڈنٹ نیوز پاکستان-آئی این پی