پارٹی صدر کے انتخاب کے لیے مسلم لیگ ن کی جنرل کونسل کا اجلاس(آج) بروز منگل طلب کر لیا گیا۔ پارٹی صدر کے انتخاب کیلئے پارٹی کا الیکشن کمیشن کاغذات نامزدگی جاری کرے گا، ن لیگ کے الیکشن کمیشن کی سربراہی رانا ثنا اللہ کریں گے جبکہ اقبال ظفر جھگڑا، عشرت اشرف، جمال شاہ کاکڑ اور کھیل داس کوہستانی الیکشن کمیشن کے ارکان میں شامل ہیں۔ پارٹی صدر کے الیکشن کیلئے جمع شدہ کاغذات نامزدگی کی جانچ پڑتال 28 مئی کی دوپہر 1 تا 2 بجے ہو گی۔ (آج) 28 مئی کی سہ پہر 4 بجے ن کی مرکزی جنرل کونسل نئے صدر کا انتخاب کرے گی، مسلم لیگ ن نے گزشتہ روز کے جنرل کونسل اجلاس کا ایجنڈا بھی جاری کر دیا، اجلاس کے دوران پارٹی آئین میں مجوزہ ترامیم کی جائیں گی۔ اجلاس میں مختلف قرار دادیں پیش کی جائیں گی، مسلم لیگ ن کی جنرل کونسل کا اجلاس مقامی ہوٹل میں طلب کیا گیا ہے۔

کریڈٹ: انڈیپنڈنٹ نیوز پاکستان-آئی این پی