پاکستان پوسٹ نے مختلف اہم مواقع اور عظیم شخصیات کی یاد میں سال 2022 کے دوران کل 11 ڈاک ٹکٹ جاری کئے۔ گزشتہ سال جاری کیے گئے ان 11 ڈاک ٹکٹوں میں سے سال کا پہلا ڈاک ٹکٹ 01 جنوری 2022 کو پاکستان اور جاپان کے درمیان سفارتی تعلقات کی 70 ویں سالگرہ کی یاد میں جاری کیا گیا۔ اس یادگاری ڈاک ٹکٹ کا سائز 81 x 40 ملی میٹر ہے جبکہ اس کی مالیت 20 روپے ہے۔پاکستان اور جاپان کے درمیان سفارتی تعلقات 28 اپریل 1952 کو قائم ہوئے۔ جاپان امن معاہدے کی توثیق کرنے والے چند ممالک میں پاکستان پہلے نمبر پر ہے۔ دوسرا یادگاری ڈاک ٹکٹ پاکستان اور سپین کے درمیان سفارتی تعلقات کی 70 ویں سالگرہ کے موقع پر 14 جنوری 2022 کو جاری کیا گیا۔

یادگاری ڈاک ٹکٹ جس میں پلازہ ڈی سیبلس، سپین اور اسلامیہ کالج پشاور کی تصاویر شائع کی گئی ہیں جس کا مقصد ہمارے دونوں ممالک کے درمیان دوستانہ تعلقات کا جشن منانا ہے، پاکستان اور اسپین کے تعلقات ہم آہنگی کی علامت ہیں جو مشترکہ نظریات، جمہوریت، تکثیریت، امن اور سلامتی کے مشترکہ مفادات پر مبنی ہیں۔پاکستان پوسٹ نے23 مارچ 2022 کو اسلام آباد میں 22 اور 23 مارچ 2022 کو منعقدہ او آئی سیوزرائے خارجہ کونسل کے48 ویں اجلاس کے موقع پر تیسرا ڈاک ٹکٹ جاری کیا۔ یہ اجلاس خاص اہمیت کا حامل ہے کیونکہ یہ پاکستان کی آزادی کی 75 ویں سالگرہ کی تقریبات کے موقع پر منعقد کیا گیا۔پاکستان میں خواتین کی تعلیم کے سب سے بااثر اداروں میں سے ایک لاہور کالج برائے خواتین، لاہور کالج برائے خواتین یونیورسٹی لاہور (1922ـ2022) کے100 شاندار سال منانے کے لیے پاکستان پوسٹ نے25 مئی، 2022 کو سال کا چوتھا یادگاری ڈاک ٹکٹ جاری کیا جس میں یونیورسٹی کی تصاویر کی منظرکشی کی گئی۔پاکستان پوسٹ نے اٹک ریفائنری لمیٹڈ کی صد سالہ تقریب کے موقع پر 25 جولائی 2022 کو سال کا 5 واں ڈاک ٹکٹ جاری کیا۔ اے آر ایل ملک میں خام تیل کو صاف کرنے کا ایک علمبردار ہے جس نے1922 سے آپریشن کا آغاز کیا تھا۔ پاکستان کی ڈائمنڈ جوبلی (1947ـ2022) کے موقع پر، پاکستان پوسٹ نے 14 اگست 2022 کو ایک یادگاری ڈاک ٹکٹ جاری کیا، جس پر پاکستان کی یادگاروں کی منظر کشی کی گئی ہے۔

اس ڈاک ٹکٹ پر ڈائمنڈ جوبلی کی تقریب کے لوگو کے ساتھ ''آزادی اور خدمت کے 75 سال اور آزادی، اتحاد، ایمان اور نظم و ضبط کی حقیقی روح کے الفاظ بھی شامل ہیں۔ سال کا ساتواں ڈاک ٹکٹ بھی 14 اگست 2022 کو بین الاقوامی دفاعی نمائش اور سیمینار (IDEAS) 2022 کے 11ویں ایڈیشن کے موقع پر جاری کیا گیا۔آئیڈیاز سال 2000 سے کامیابی کی ایک مسلسل کہانی ہے اور اب بین الاقوامی دفاعی نمائش کنندگان، اعلی سطح کے وفود، سیکورٹی تجزیہ کاروں اور اعلی درجہ کے پالیسی منصوبہ سازوں کا ایک پلیٹ فارم ہے۔پاکستان انسٹی ٹیوٹ آف انٹرنیشنل افیئرز کی عالمی سطح پر تسلیم شدہ شاندار کارکردگی اور کامیابیوں کی 75ویں سالگرہ کے موقع پر، پاکستان پوسٹ نے 14 نومبر 2022 کو سال کا 8 واں ڈاک ٹکٹ جاری کیا۔ ڈاک ٹکٹ پر پاکستان انسٹی ٹیوٹ آف انٹرنیشنل افیئرز کی عمارت کی تصویر ہے۔ پاکستان اور آسٹریلیا کے سفارتی تعلقات کے قیام کی 75 ویں سالگرہ منانے کے لیے، ہائی کمیشن برائے پاکستان، کینبرا، آسٹریلیا نے پاکستان پوسٹ کے تعاون سے 15 نومبر 2022 کو ایک یادگاری ڈاک ٹکٹ جاری کیا۔اس ڈاک ٹکٹ پر پاکستان اور آسٹریلیا کی پارلیمنٹ کی تصاویر شائع کی گئی ہیں جو دونوں ممالک کی انتہائی باوقار اور معزز جمہوریتوں کی علامت ہیں۔ پاکستان پوسٹ نے 23 نومبر 2022 کوبصارت اور قوت گویائی و سماعت سے محروم بچوں کے لئے قائم تعلیمی ادارے آئی ڈی اے رئیو کی خدمات (1922ـ2022) کے 100 سال کی تکمیل کے موقع پر سال کا 10 واں یادگاری ڈاک ٹکٹ جاری کیا۔یہ ادارہ ویلفیئر ایسوسی ایشن کے طور پر 1922 میں قائم کیا گیا تھا، جو پاکستان میں بصارت اور قوت گویائی و سماعت سے محروم بچوں کی سب سے قدیم درسگاہ ہے۔ پاکستان پوسٹ نے گزشتہ سال 27 دسمبر 2022 کو پاکستان اور امریکہ کے درمیان سفارتی تعلقات کی 75 ویں سالگرہ کے موقع پر سال کا آخری یادگاری ڈاک ٹکٹ جاری کیا۔ اس ڈاک ٹکٹ پر مینار پاکستان لاہور اور مجسمہ آزادی (امریکہ)کی عکاسیکی گئی ہے جو دونوں ممالک کی انتہائی باوقار اور معزز جمہوریتوں کی علامت ہیں۔ تمام 11 یادگاری ڈاک ٹکٹ 20 روپے کے ہیں جو ملک کے تمام اہم ڈاک خانوں میں فروخت کے لیے دستیاب ہیں۔

کریڈٹ: انڈیپنڈنٹ نیوز پاکستان-آئی این پی