وفاقی وزیر اطلاعات عطااللہ تارڑنے کہا کہ وزیراعظم کا دورہ بیلاروس انتہائی اہمیت کا حامل ہے۔وفاقی وزیر اطلاعات نے وزیراعظم شہباز شریف کے دورہ بیلاروس کے حوالے سے گفتگو کرتے ہوئے کہا کہ بیلاروس کے صدر الیگزینڈر لوکاشینکو کے چند ماہ قبل دورہ پاکستان کے دوران متعدد شعبوں میں تعاون بڑھانے پر اتفاق ہوا تھا۔عطااللہ تارڑ نے کہا کہ وزیراعظم شہباز شریف کے دورہ بیلاروس کے دوران زرعی مشینری، دفاع، دفاعی پیداوار اور مختلف شعبوں میں تعاون بڑھانے کے لیے مفاہمتی یادداشتوں پر دستخط ہوں گے، جبکہ پاکستان اور بیلاروس کے درمیان تعلقات کو مزید وسعت دینے پر بھی بات چیت ہوگی۔وفاقی وزیر اطلاعات کا کہنا ہے کہ بیلاروس کے صدر کا مسلم لیگ ن کے قائد محمد نواز شریف کے ساتھ ذاتی اور دیرینہ تعلق ہے، محمد نواز شریف کو بطور مہمان خصوصی غیر رسمی عشایئے پر مدعو کیا گیا ہے۔

عطااللہ تارڑ نے مزیدکہا کہ وزیراعظم شہباز شریف کا دورہ بیلاروس انتہائی اہم ہے جو دونوں ممالک کے درمیان تعلقات میں مثبت پیشرفت ثابت ہوگا، گزشتہ ایک سال میں پاکستان نے عالمی سطح پر تنہائی سے نکل کر فعال خارجہ پالیسی کی جانب قدم بڑھایا۔ وفاقی وزیر اطلاعات کا کہنا ہے کہ متعدد عالمی سربراہان نے پاکستان کے دورے کیے، پاکستان نے شنگھائی تعاون تنظیم( ایس سی او) سربراہ اجلاس کی میزبانی کی، مختلف ممالک کے ساتھ پاکستان کے معاہدے عملی شکل اختیار کر گئے ہیں۔عطااللہ تارڑ نے کہا کہ پاکستان منرلز انوسٹمنٹ فورم میں دنیا بھر سے 300 سے زائد ماہرین اور مندوبین نے شرکت کی، بیرونی سرمایہ کار پاکستان آ کر مختلف منصوبوں میں سرمایہ کاری کر رہے ہیں۔وفاقی وزیر اطلاعات نے مزید یہ بھی کہا کہ بزنس فورمز کے انعقاد سے ملکی معیشت کو استحکام مل رہا ہے، پاکستان عالمی سطح پر ابھرتی ہوئی معیشت کے طور پر سامنے آ رہا ہے۔

کریڈٹ: انڈیپنڈنٹ نیوز پاکستان-آئی این پی