گورنر سندھ کامران ٹیسوری نے کہا کہ وزیراعظم اور آرمی چیف ملکی ترقی اور معاشی استحکام کیلئے کام کررہے ہیں،بلوچستان میں دشمن طاقتیں حالات خراب کرنا چاہتی ہیں، فورسز نے دہشتگردوں کو منہ توڑ جواب دیا ۔پی آئی بی کالونی کراچی میں میڈیا سے گفتگو کرتے ہوئے گورنر سندھ نے کہا پاکستان ترقی کی جانب جارہا ہے، پاکستان اسٹاک ایکس چینج میں بہتری آرہی ہے، آئی ایم ایف نے بھی قرضہ ری شیڈول کردیا ہے، ملک کی ترقی کے لیے حکومت اور اتحادی دن رات کام کررہے ہیں، ماضی میں حکمرانوں نے ایک کروڑ نوکریاں اور 50 لاکھ گھر بنانے کا کہا، کہا گیا گورنرہائوس کی دیواریں گرا کر جامعات بنائیں گے، ہم نے ایسا دعوی نہیں کیا لیکن 50 ہزار طلبا کو گورنر ہاس میں آئی ٹی کورس کرارہے ہیں۔

گورنر سندھ کا مزید کہنا تھا کہ مقصد صرف یہی ہے کہ لوگوں کو پیروں پر کھڑا کیا جاسکے۔ انہوں نے کہا دشمن قوتیں حالات خراب کرنا چاہتی ہیں تاکہ ملک ترقی نہ کرے ۔ میں نے اپنے بلوچ بھائیوں کو گورنر ہاوس میں افطار پر دعوت دی ہے ۔کامران ٹیسوری نے کہا ہے کہ بلوچستان میں دشمن طاقتیں حالات خراب کرنا چاہتی ہیں کیونکہ افواج پاکستان نے دہشت گردوں کو منہ توڑ جواب دیا، کامران ٹیسوری کا مزید کہنا تھا کہ اس شہر کے لیے ترقیاتی کام کروانے ہیں، سڑکیں اور گلیاں اعلی معیار کی ہوں، گھروں میں پینے کے پانی اور گیس کی فراہمی ہو، اس شہر میں لوگ منشیات، گٹکے کے عادی بنتے جارہے ہیں، ہمیں انہیں آئی ٹی اور ہنر سکھا کر پیروں پر کھڑا کرنا ہے۔انہوں نے کہا کہ کوئی چیز سوشل میڈیا پر بغیر تصدیق کے نہ پھیلائیں کیونکہ اس سے ملک اور افواج کو نقصان پہنچتا ہے۔گورنر سندھ کامران ٹیسوری نے وعدہ کیا کہ کراچی کو پھر سے روشنیوں کا شہر بنائیں گے۔

کریڈٹ: انڈیپنڈنٹ نیوز پاکستان-آئی این پی