وزیراعلی سندھ اور ورلڈ بینک کے وفد کے درمیان سندھ فلڈ ایمرجنسی پروجیکٹ کے تحت سیلاب سے تباہ گھروں کی تعمیر کرنے پر اتفاق کیا گیا ہے۔ تفصیلات کے مطابق وزیراعلی سندھ سید مراد علی شاہ سے ورلڈ بینک کے کنٹری ڈائریکٹر ناجی بین ہسن کی سربراہی میں اعلی سطحی وفد کی ملاقات ہوئی ہے۔ اس حوالے سے ترجمان وزیراعلی سندھ کا کہنا ہے کہ ورلڈ بینک کے ساتھ یہ گزشتہ اجلاس کی فالو اپ اجلاس ہے۔ ترجمان نے بتایا کہ اجلاس میں ایس آر پی پروجیکٹ کے 22 ملین ڈالرز سے 110000 ٹینٹ، 300000 مچھردانیاں، ڈی واٹرنگ پمپس اور کشتیاں خریدنے پر اتفاق کیا گیا ہے جبکہ ایس آئی اے پی ای پی پروجیکٹ سے 8.3 ملین کی منظوری دے کر 268 سڑکوں کی مرمت کی جائے گی ۔ کے ڈبلیو ایس ایس آئی پی سے 25 ملین ڈالرز کو سیلاب متاثرین کی بحالی کیلئے استعمال کرنے اور 1.33 بلین ڈالرز سندھ فلڈ ایمرجنسی پروجیکٹ کے تحت سیلاب سے تباہ گھروں کی تعمیر کرنے پر اتفاق کیا گیا ہے۔ اس موقع پر وزیراعلی سندھ نے پی اینڈ ڈی ہدایت جاری کی کہ دسمبر 2022 تک گھروں کی تعمیر کا پلان بنایا جائے۔ انہوں نے بتایا کہ پلان ورلڈ بینک منظور کرے گی اور گھروں کی تعمیر شروع کرینگے۔ وزیراعلی سندھ کا کہنا تھا کہ ہمیں اگلے مون سون کی تیاری اور اپنی آبپاشی اور ڈرینیج سسٹم کو بھی ٹھیک کرنا ہے۔

کریڈٹ: انڈیپنڈنٹ نیوز پاکستان-آئی این پی