وزیراعلی پنجاب مریم نواز نے " اپنی چھت، اپنا گھر" ہاوسنگ پراجیکٹ کی اصولی منظوری دے دی۔ وزیراعلی پنجاب مریم نواز کی زیر صدارت ہاوسنگ پراجیکٹ کے حوالے سے خصوصی اجلاس ہوا جس میں سینئر صوبائی وزیر مریم اورنگزیب، سینیٹر پرویز رشید،وزیر اطلاعات عظمی بخاری،ایم پی اے ثانیہ عاشق، چیف سیکرٹری، کمشنر لاہور اور دیگر متعلقہ حکام شریک ہوئے۔ اجلاس میں وزیراعلی پنجاب کو ماڈل گھروں کی تعمیر اور ماہانہ قسط پر بریفنگ دی گئی، اجلاس کے شرکا کو بتایا گیا کہ کم آمدن والے بے گھر لوگوں کی ہاوسنگ سکیم کیلئے پانچ شہروں میں سٹیٹ لینڈ کی نشاندہی کرلی گئی ہے۔ دوران اجلاس وزیراعلی پنجاب نے لاہور سمیت پانچ بڑے شہروں میں 519کنال اراضی پر "اپنی چھت، اپنا گھر" پراجیکٹ کی اصولی منظوری دے دی، اجلاس میں گھروں کے نقشوں کیلئے پاکستان کونسل فار آرکیٹیکٹ اینڈ ٹاون پلانرزسے مشاورت پر بھی اتفاق ہوا۔ مریم نوازنے "اپنی چھت، اپنا گھر" پراجیکٹ کو شہروں کے قریب تر لانچ کرنے کی ہدایت کرتے ہوئے کم سے کم لاگت میں بہترین گھرتیار کرنے کا حکم دیا۔

کریڈٹ: انڈیپنڈنٹ نیوز پاکستان-آئی این پی