پی ٹی آئی کے سیکرٹری جنرل سلمان اکرم راجہ نے کہا ہے کہ پی ٹی آئی سول نافرمانی کی تحریک اور مطالبات سے پیچھے نہیں ہٹے گی، عمران خان آج 15دسمبر کو آئندہ کے لائحہ عمل کا اعلان کریں گے، سول نافرمانی کی تحریک کیلئے پی ٹی آئی کا وہی مئوقف ہے جو عمران خان کا ہے۔ایک انٹرویو میں انہوں نے کہا کہ پی ٹی آئی اپنے مطالبات سے پیچھے نہیں ہٹی، عمران خان بالکل بھی اپنے مئوقف سے پیچھے نہیں ہٹے، کیونکہ جب سب دروازے اور قانونی راستے بند کردیتے ہو، 26ویں آئینی ترمیم کے بعد جو عدالتوں کی صورتحال ہے۔8فروری کو الیکشن کو لوٹا گیا، عوام کے فیصلے کو رد کیا گیا۔ 26 نومبر کو جو کچھ ہوا اس سے پیچھے نہیں ہٹ رہے۔ ہم بند گلی میں نہیں بیٹھ سکتے۔ہمیں کہاجارہا ہے کہ آپ پر تمام راستے بند کردیئے گئے ہیں، نہ عدالتی راستہ اور الیکشن کے ذریعے کچھ ہوگا، سول نافرمانی کو اس تناظر میں دیکھنا چاہئے۔انہوں نے کہا ہماری خواہش ہے کہ آئین قانون چلے اور احتجاج کا حق دیا جائے۔ لیکن ایف آئی آرز درج کردی جاتی ہیں۔مذاکرات اور احتجاج دونوں ساتھ چل سکتے ہیں ان میں کوئی تضاد نہیں ہے۔ میرا نہیں خیال کہ بانی پی ٹی آئی پارٹی قیادت سے ناراض ہیں، پارٹی قیادت کا بانی سے رابطہ ختم نہیں ہوا، بانی کا نظریہ اور انداز مختلف ہوسکتا ہے لیکن غصے میں نہیں ہیں۔

کریڈٹ : انڈیپنڈنٹ نیوز پاکستان-آئی این پی