حکومت نے پاکستان میں بجلی کی پیداوار اور خرید کیلئے ایک انڈپینڈنٹ ملٹی پلیئر مارکیٹ بنانے کی منظوری دے دی، وزیراعظم شہباز شریف نے بجلی شعبے میں چوری اور نقصانات کو کم کرنے کیلئے اقدامات تیز اور موثر بنانے کی ہدایت کرتے ہوئے کہا ہے کہ بجلی چوری میں ملوث تقسیم کار کمپنیوں کے ملازمین کے خلاف محکمانہ کارروائی کی جائے، بجلی شعبے کی اصلاحات کیلئے ترجیحی بنیادوں پر اقدامات کر رہے ہیں۔وزیرِ اعظم شہباز شریف کی زیرِ صدارت کابینہ کمیٹی برائے توانائی کا اجلاس اسلام آباد میں ہوا، جس میںجس میں حکومت کی جانب سے ملک کے توانائی شعبے کی اصلاحات کیلئے بڑا اقدام کرتے ہوئے پاکستان میں بجلی کی پیداوار اور خرید کیلئے ایک انڈپینڈنٹ سسٹم اینڈ مارکیٹ آپریٹر ( آئی ایس ایم او )کی تشکیل کی اصولی منظوری دی گئی، جس کی کابینہ سے توثیق لی جائے گی۔آئی ایس ایم او کو کمپنیز ایکٹ 2017 کے تحت سکیورٹیز اینڈ ایکسچینج کمیشن آف پاکستان (ایس ای سی پی ) سے رجسٹر کیا جائے گا۔اجلاس کے جاری اعلامیہ میں کہا گیا کہ حکومت کے بجلی کے واحد خریدار کے کردار کو ختم کرکے بجلی کی مارکیٹ کو ملٹی پلیئر انڈپینڈنٹ مارکیٹ میں تبدیل کیا جائے گا، اس ادارے کے ذریعے پاکستان میں بجلی کی ایک موثر اور شفاف مسابقتی مارکیٹ قائم کی جائے گی۔اعلامیہ کے مطابق صارفین کو تقسیم کار کمپنیوں کے علاوہ دیگر سپلائرز سے بجلی خریدنے کی سہولت فراہم ہو سکے گی جب کہ کم سے کم لاگت کی بجلی کی پیداوار اور ترسیل کے نظام کے لیے طویل مدتی منصوبہ بندی کی جا سکے گی۔اس اقدام سے گردشی قرضے اور بجلی کے نرخوں میں خاطر خواہ کمی واقع ہوگی جب کہ آئی ایس ایم او کے بورڈ میں بجلی کے شعبے کے ماہرین کی شمولیت یقینی بنائی جائے گی۔اعلامیہ کے مطابق اجلاس کو بجلی کے شعبے کے گردشی قرضوں پر بریفنگ بھی دی گئی۔اس موقع پر وزیراعظم شہباز شریف نے کہا کہ بجلی شعبے کی اصلاحات کیلئے ترجیحی بنیادوں پر اقدامات کر رہے ہیں، بجلی چوری میں ملوث تقسیم کار کمپنیوں کے ملازمین کے خلاف محکمانہ کاروائی کی جائے۔انہوں نے کہا کہ بجلی شعبے کی اصلاحات اور چوری کے سدباب کیلئے جدید ٹیکنالوجی کا استعمال یقینی بنایا جائے۔

کریڈٹ: انڈیپنڈنٹ نیوز پاکستان-آئی این پی