ملک کے مختلف علاقوں میں ٹریفک حادثات کے دوران ایک ہی خاندان کے 5افراد سمیت کم سے کم 11افراد جاں بحق اور 12کے قریب زخمی ہو گئے۔پولیس کے مطابق فیصل آباد کے علاقے تاندلیانوالہ میں دھن کے باعث ایک المناک حادثہ پیش آِیا جہاں لاہور سے آنے والی ایک کار جس میں بچے اور خواتین اور ایک مرد سوار تھا، دھند کے باعث کار گنے سے لدی ٹرالی سے ٹکرا گی جس کے نتیجے میں اس میں سوار ایک خاتون رابعہ بی بی اپنے بیٹیوں 13 سالہ فجر، 11 سالہ عمامہ، 6 سالہ یحیی، ایک سالہ موسی اور رشتے دار بچے ایک سالہ رئیس سمیت جاں بحق ہو گئی۔پولیس حکام کا کہنا ہے کہ حادثے کے بعد گنے والی ٹرالی کا ڈرائیور موقع سے فرار ہو گیا جس کی تلاش جاری ہے۔پولیس کے مطابق کار چلانے والا شخص شاہزیب بیوی اور بیٹے سمیت شدید زخمی ہوئے حادثے کے اطلاع ملنے پر پولیس اور ریسکیو اہلکاروں نے موقع پر پہنچ کر امدادی کارروائیوں کے دوران لاشیں اور زخمیوں کو کار سے نکال کر اسپتال منتقل کر دیا، جہاں تینوں شدید زخمی کو علاج کے لیے الائیڈ اسپتال فیصل آباد منتقل کر دیا گیا ہے۔

دریں اثنا سرچشمہ کے مقام پر ٹریلر اورگاڑی میں خوفناک تصادم ہوا ہے، جس کے نتیجے 3 افراد موقع پر ہی جاں بحق ہوگئے جبکہ 5 شدید زخمی ہوگئے۔ واشک میں اسپتال ذرائع کا کہنا ہے کہ زخمیوں اورجاں بحق افراد کا تعلق بسیمہ سے بتایا جا رہا ہے، زخمیوں کو سول اسپتال سے ابتدائی طبی امداد کے بعد کوئٹہ ریفرکر دیا گیا ۔اسپتال ذرائع کے مطابق زخمیوں میں 4 افراد کی حالت تشویشناک ہے۔ جنہیں بچانے کی کوششیں کی جارہی ہیں۔ اس سے قبل کراچی کے علاقے نیو سبزی منڈی کے قریب پیش آنے والے افسوسناک حادثے کے نتیجے میں خاتون 3 سالہ بچے سمیت جاں بحق ہوگئی۔ریسکیو حکام نے بتایا کہ حادثے میں خاتون اور بچہ جاں بحق ہوئے ہیں، جاں بحق خاتون کی شناخت 45 سالہ خورشیدہ کے نام سے ہوئی ہے جبکہ بچے کی شناخت 3 سالہ ذوہیب کے نام سے ہوئی ہے۔ ادھر کراچی کے علاقے ملیر کینٹ روڈ پر بھی دو گاڑیوں میں خوفناک تصادم ہوا، جس کے نتیجے میں چار نوجوان زخمی ہوگئے جب کہ گاڑیاں مکمل طور پر تباہ ہو گئیں۔حادثہ اتنا خطرناک تھا کہ ایک گاڑی کا انجن نکل کر سڑک پر دور جا گرا اور گاڑی قلابازیاں کھاتی ہوئی فٹ پاتھ کے قریب جا کر رکیں جب کہ دوسری گاڑی کے اگلے حصے کو بھی شدید نقصان پہنچا۔ حادثے کی اطلاع ملتے ہی پولیس اور ریسکیو ادارے جائے حادثہ پر پہنچے اور زخمیوں کو اسپتال منتقل کیا۔

کریڈٹ : انڈیپنڈنٹ نیوز پاکستان-آئی این پی