اینٹی نارکوٹکس فورس( اے این ایف) نے بھاری مقدار میں آئس بیرون ملک اسمگل کرنے کی کوشش ناکام بنا دی۔ترجمان اے این ایف کے مطابق اے این ایف نے انٹیلی جنس اطلاع پر ساتھ ایشیا پاکستان ٹرمینل کراچی پرکارروائی کی۔ کارروائی کے دوران ملائیشیا کے لیے بک کروائے گئے کنٹینر سے 700 کلو گرام میتھ ایمفیٹامائن (آئس ) برآمد ہوئی۔ترجمان کا مزید کہنا تھا کہ برآمد شدہ آئس کیلشیم کاربونیٹ کے ساتھ مکس کر کے اسمگل کی جا رہی تھی۔ کنٹینر میں موجود کیلشیم کاربونیٹ کے 854 بیگوں کی تلاشی لی گئی۔ 28 بیگوں میں موجود کیلشیم کاربونیٹ میں آئس کی موجودگی کی نشاندہی ہوئی۔ کنٹینر بک کروانے والے کراچی کے رہائشی ملزم کو گرفتار کر لیا گیا۔کنٹینر کراچی میں قائم نجی کمپنی کی جانب سے ملائشیا کے شہر کوالالمپور کے لئے بک کروایا گیا تھا۔ دیگر ملزمان کی گرفتاری کیلئے گرفتار ملزم سے تحقیقات کی جا رہی ہیں۔

کریڈٹ : انڈیپنڈنٹ نیوز پاکستان-آئی این پی