بھارت کے غیر قانونی زیر قبضہ جموںوکشمیر میں بھارتی فوجیوں نے اپنی ریاستی دہشت گردی کی تازہ کارروائیوں کے دوران ہفتہ کو بارہمولہ اور راجوری اضلاع میں مزید دو کشمیری نوجوانوں کو جعلی مقابلوں میں شہید کر دیا۔کشمیر میڈیا سروس کے مطابق فوجیوں نے بارہمولہ کے علاقے کنزر میں محاصرے اور تلاشی کی کارروائی کی کارروائی کے دوران ایک نوجوان کو شہید کیا۔ فوجیوں نے راجوری کے علاقے کیساری Kesariمیں جاری فوجی آپریشن میں ایک اور نوجوان کو شہید کر دیا۔ اس سے قبل گزشتہ روز کیساری میں ایک دھماکے میں پانچ بھارتی فوجی ہلاک اور متعدد زخمی ہوگئے تھے۔ آخری اطلاعات تک ان علاقوں میں بھارتی فوج آپریشن جاری تھا۔ان تازہ شہادتوںکے نتیجے میں گزشتہ چار دنوں میں شہید ہونے والے نوجوانوں کی تعداد چھ ہو گئی ہے۔ بھارتی فوجیوں نے بدھ کو ضلع کپواڑہ کے علاقے مژھل میں دو جبکہ جمعرات کو ضلع بارہمولہ کے علاقے کریری میں دو نوجوانوں کو شہید کیا تھا۔دریں اثنا، راجوری اور پونچھ اضلاع کے مختلف علاقوں میں بھارتی فوجیوں کی پرتشدد فوجی کارروائیاں جاری ہیں۔ بھارتی فوجیوں ،پیراملٹری اور پولیس اہلکاروں نے ان اضلاع میں یہ آپریشن 20اپریل کی شام اس وقت شروع کیا تھا جب پونچھ کے علاقے مینڈھرمیں بھارتی فوج کی ایک گاڑی پر حملے میں پانچ اہلکار ہلاک اور ایک زخمی ہوا تھا۔ آپریشن میں گن شپ ہیلی کاپٹروں، ڈرون کیمروں اور سراغرساں کتوں کا بھی استعمال کیا جا رہا ہے۔

کریڈٹ: انڈیپنڈنٹ نیوز پاکستان-آئی این پی