محکمہ موسمیات نے ملک کے بیشتر علاقوں میں بارشوں کی پیشگوئی کر دی۔محکمہ موسمیات کے مطابق آئندہ 24 گھنٹوں کے دوران ملک کے کئی علاقوں میں موسم گرم اور خشک رہنے کا امکان ہے تاہم خیبرپختونخوا، بالائی پنجاب، اسلام آباد، شمال مشرقی بلوچستان، کشمیر اور گلگت بلتستان میں مطلع جزوی طور پر ابرآلود رہے گا۔محکمہ موسمیات نے پیشگوئی کی ہے کہ خیبرپختونخوا، بالائی پنجاب اور شمال مشرقی بلوچستان میں بارش کا امکان ہے جبکہ اسلام آباد میں آئندہ 24گھنٹوں میں تیز ہوائوں کے ساتھ چند مقامات پر بارش کا امکان ہے، اسی طرح خیبر پختونخوا اور خطہ پوٹھوہار میں چند مقامات پر ژالہ باری بھی متوقع ہے۔بلوچستان کے اضلاع ژوب، موسی خیل، بارکھان، قلعہ سیف اللہ اور قلات میں بارش متوقع ہے۔ جبکہ خضدار اور گردو نواح میں تیز ہواوں اور گرج چمک کے ساتھ بارش کا امکان ہے۔پنجاب کے علاقے راولپنڈی، اٹک، چکوال، جہلم، تلہ گنگ اور میانوالی میں بھی بارش کا امکان ہے، حافظ آباد، گوجرانوالہ، منڈی بہاالدین، گجرات اور سیالکوٹ میں بھی بادل برسیں گے۔ اس کے علاوہ نارووال، لاہور، شیخوپورہ اور فیصل آباد میں بارش اور بعض مقامات پر ژالہ باری کا امکان ہے جبکہ مری، گلیات اور گردونواح میں گرج چمک کے ساتھ بارش ہو سکتی ہے۔

گلگت بلتستان اور آزاد کشمیر کے مختلف علاقوں میں تیز ہواوں اور گرج چمک کے ساتھ بارش ہو سکتی ہے جبکہ سندھ کے بیشتر اضلاع میں موسم شدید گرم اور خشک رہے گا۔ دوسری جانب محکمہ موسمیات کے مطابق خیبر پختونخوا کے بیشتر اضلاع میں موسم جزوی ابرآلود رہنے کا امکان ہے، صوبے کے جنوبی اضلاع میں دن کے اوقات میں موسم گرم رہے گا،آئندہ 24 گھنٹوں کے دوران چترال، دیر، سوات، شانگلہ، بونیر، مالاکنڈ، باجوڑ، ایبٹ آباد، مانسہرہ، ہری پور، بٹگرام، کوہستان، تورغر، کرم، خیبر، اورکزئی، مہمند، مردان اور صوابی میں گرج چمک اور تیزہوائوں کے ساتھ بارش کا امکان ہے۔پشاور کا کم سے کم درجہ حرارت 19 ڈگری سینٹی گریڈ ریکارڈ کیا گیا، شہر کا زیادہ سے زیادہ درجہ حرارت 38 ڈگری سینٹی گریڈ تک جانے کا امکان ہے، سب سے کم درجہ حرارت کالام 7 ، چترال 10 ڈگری سینٹی گریڈ ریکارڈ کیا گیا۔ ادھرکراچی میں موسم کے بدلتے رنگ نظر آنے لگے ہیں، محکمہ موسمیات کے مطابق گرمی کی شدت میں کمی کا امکان ہے۔ شہر میں سمندری ہوائیں مکمل طور پر بحال ہو چکی ہیں، جس کے باعث موسم نسبتا خوشگوار ہونے کی امید ہے۔محکمہ موسمیات کا کہنا ہے کہ اچی کے درجہ حرارت میں 1 سے 2 ڈگری سینٹی گریڈ کمی متوقع ہے، جبکہ زیادہ سے زیادہ درجہ حرارت 35 سے 37 ڈگری سینٹی گریڈ کے درمیان رہنے کا امکان ہے۔شہر میں اس وقت مطلع صاف ہے اور تیز دھوپ کے ساتھ موسم گرم اور مرطوب ہے۔

موجودہ درجہ حرارت 28 ڈگری سینٹی گریڈ ریکارڈ کیا گیا ہے، جب کہ گرمی کی شدت 32 ڈگری سینٹی گریڈ تک محسوس کی جا رہی ہے۔ ہوا میں نمی کا تناسب 71 فیصد ہے اور جنوب مغربی سمت سے 8 کلومیٹر فی گھنٹہ کی رفتار سے ہوائیں چل رہی ہیں۔محکمہ موسمیات کے مطابق آئندہ 24 گھنٹوں کے دوران بھی موسم گرم اور مرطوب رہنے کا امکان ہے، تاہم سمندری ہوائوں کی بحالی سے درجہ حرارت میں مزید بہتری کی امید ہے۔ دریں اثنا محکمہ موسمیات نے ملک میں گرمی کی شدید لہر کودیکھتے ہوئے ہیٹ ویو ایڈوائزری جاری کردی۔محکمہ موسمیات کے مطابق آئندہ دوروز میں صوبہ سندھ ، جنوبی و وسطی پنجاب اور بلوچستان کے کچھ حصوں میں درجہ حرارت معمول سے 4 سے7 ڈگری سینٹی گریڈ زیادہ رہنے کا امکان ہے۔گزشتہ 24 گھنٹوں کے دوران ملک میں سب سے زیادہ درجہ حرارت دادو مو ہنجو داڑو، نوابشاہ اور پڈ عیدن میں 47 ڈگری سینٹی گریڈ ریکارڈ کیا گیا جب کہ خیرپور، سبی ،لاڑکانہ 46، رحیم یار خان، سکرنڈ، جیکب آباد، مٹھی اور سکھر میں 45 ڈگری ریکارڈ ہوا۔اس کے علاوہ کراچی، ملتان، ڈیرا اسماعیل خان 40، پشاور،مظفر آباد37، اسلام آباد 35،کوئٹہ 32 اور گلگت میں زیادہ سے زیادہ درجہ حرارت 31 ڈگری ریکارڈ کیا گیا۔

کریڈٹ: انڈیپنڈنٹ نیوز پاکستان-آئی این پی